18 April, 2019 07:50 AM IST | સુરત
માતાની નજર સામે જ ડૂબ્યો બાળક
ન્યુ સિટીલાઇટમાં ડીઆરબી કૉલેજ સામે પાલિકા સંચાલિત સ્વિમિંગ-પૂલમાં મંગળવારે સાંજે ૧૧ વર્ષના એક ટીનેજરનું ડૂબી જતાં મૃત્યુ થયું હતું. આ સ્વિમિંગ-પૂલમાં ચાર તરવૈયાઓ તહેનાત હોવા છતાં ટીનેજરનું મોત થતાં ગંભીર બેદરકારી સામે આવી છે. ચૈતન્ય નામનો ડૂબી ગયેલો કિશોર માતા-પિતાનું એકનું એક સંતાન હતો.
મૂળ મહારાષ્ટ્રના રાયગડના વતની અને મગદલ્લા સુમન સ્વીટમાં રહેતા વિઠ્ઠલભાઈ કનોજેનો ૧૧ વર્ષનો પુત્ર ચૈતન્ય માતા પ્રતિભા સાથે પાલિકા સંચાલિત સ્વિમિંગ-પૂલમાં તરવાનું શીખવા ગયો હતો. માતા સ્વિમિંગ-પૂલમાં સામે બેસીને તેને જોતી હતી. એ અરસામાં માત્ર બે મિનિટમાં ચૈતન્યનું પાણીમાં ડૂબી જતાં મોત થયું હતું. ચૈતન્ય લોકભારતી સ્કૂલમાં પાંચમા ધોરણમાં ભણતો હતો. તેના પિતા સેલ્સમૅન છે અને માતા ફિઝિયોથેરપિસ્ટને ત્યાં નોકરી કરે છે. ખટોદરા પોલીસે બાળકના મૃતદેહને પોસ્ટમૉર્ટમ માટે મોકલી આપ્યો હતો.
આ પણ વાંચોઃ નાના અને મોટા બનેં પડદા પર સફળતા મેળવનારી ગુજ્જુ ગર્લ પ્રાચીની આવી છે અદાઓ