02 December, 2022 10:02 AM IST | Rajkot | Rashmin Shah
રાજકોટમાં વોટ આપીને બન્ને તાત્કાલિક જામનગર જવા માટે રવાના થઈ ગયાં હતાં
જામનગરનાં બીજેપીનાં કૅન્ડિડેટ અને ક્રિકેટર રવીન્દ્ર જાડેજાનાં વાઇફ રીવાબા અને રવીન્દ્રનાં નામો રાજકોટના વોટર્સ લિસ્ટમાં હતાં એટલે ગઈ કાલે સવારે રાજકોટમાં વોટ આપીને બન્ને તાત્કાલિક જામનગર જવા માટે રવાના થઈ ગયાં હતાં. રીવાબા રાજકોટથી જામનગર તાત્કાલિક પહોંચે એ માટે રવીન્દ્રએ હેલિકૉપ્ટરની વ્યવસ્થા રાખી હતી. રાજકોટ-જામનગર વચ્ચે ૯૦ કિલોમીટરનું જ અંતર છે, જો ધાર્યું હોત તો દોઢ કલાકમાં બાય-રોડ જામનગર પહોંચી શકાયું હોત પણ વોટિંગના કયામતના દિવસે ખોટો સમય ન બગડે અને રીવાબા પોતાના મતવિસ્તારમાં વહેલી તકે પહોંચી જાય એવા હેતુથી રવીન્દ્રએ ચાલીસ મિનિટમાં વાઇફ જામનગર પહોંચે એવી અરેન્જમેન્ટ કરી હતી.
રાજકોટમાં રીવાબા વોટિંગ માટે પહોંચ્યાં ત્યારે ન્યુઝ ચૅનલના જર્નલિસ્ટ તેમના ઇન્ટરવ્યુ માટે રીતસર ચોંટી પડ્યા એટલે રીવાબાએ હસતાં-હસતાં કહેવું પડ્યું હતું કે જે કામ માટે આવી છું (વોટિંગ માટે) એ કામ તો પહેલાં કરવા દો, ઇન્ટરવ્યુ પછી લેજો.
રીવાબાએ ‘મિડ-ડે’ને કહ્યું હતું, ‘નવી જનરેશનને વિકાસ સિવાયની રાજનીતિમાં ઇન્ટરેસ્ટ નથી અને એટલે જ નવી જનરેશન બહાર નીકળીને બીજેપીને જિતાડવાનું કામ કરે છે તો બીજા તબક્કામાં પણ તે આ જ કામ કરશે.’
વાઇફ સાથે આવેલો રવીન્દ્ર પહેલી વાર નવા લુકમાં જોવા મળ્યો હતો. હેરસ્ટાઇલમાં રવીન્દ્રએ ખાસ્સો ચેન્જ કર્યો છે એ સ્પષ્ટ દેખાતું હતું.