06 May, 2022 04:10 PM IST | Mumbai | Gujarati Mid-day Online Correspondent
પ્રતીકાત્મક તસવીર
ગુજરાતના સુરતમાંથી એક ચોંકાવનારી ઘટના સામે આવી છે. અહીંથી વરઘોડો નીકળતા પહેલાં મિત્રો સાથે ડીજે પર ડાન્સ કરતાં વરરાજાને હાર્ટ એટેક આવ્યો હતો. પરિવારના સભ્યો તેને હોસ્પિટલ લઈ ગયા હતા, જ્યાં ડૉક્ટરોએ તેને મૃત જાહેર કર્યો હતો.
આ મામલો સુરત જિલ્લાના માંડવી તાલુકાના અરેઠ ગામનો છે. 33 વર્ષીય મિતેશ ચૌધરીનો વરઘોડો બાલોદ તાલુકાના ધામોડાળા ગામે જવાનો હતો. શોભાયાત્રાના પ્રસ્થાન પહેલાં મોટાભાગની ધાર્મિક વિધિઓ પૂર્ણ કરવામાં આવી હતી. શોભાયાત્રા થોડી જ વારમાં નીકળવાની હતી. ખુશીના પ્રસંગે વરરાજાના પરિવારજનો અને મિત્રો ડીજે પર નાચતા હતા. મિત્રોને ડાન્સ કરતા જોઈ મિતેશ પણ પોતાની જાતને રોકી ન શક્યો અને તે પણ ડીજે પાસે પહોંચી ગયો હતો. દરમિયાન ડાન્સ કરી રહેલા મિતેશને તેના મિત્રોએ તેના ખભા પર બેસાડી નાચવાનું શરૂ કર્યું હતું. ત્યારે અચાનક મિતેશની છાતીમાં દુખાવો શરૂ થયો હતો.
પરિવારજનો તરત જ મિતેશને મોટરસાયકલ પર લઈને સ્થાનિક હોસ્પિટલ પહોંચ્યા હતા. જ્યાં તબીબોએ તેની સારવાર કરવાની ના પાડી અને તેને મોટી હોસ્પિટલમાં લઈ જવાની સલાહ આપી હતી. ત્યારબાદ તેને 108 એમ્બ્યુલન્સ મારફતે બારડોલીની સરકારી હોસ્પિટલમાં લઈ જવામાં આવ્યો હતો. ત્યાં હાજર તબીબે તેને જોયો અને મૃત જાહેર કર્યો હતો. આ માહિતી મળતાં ચૌધરી પરિવારમાં શોકનો માહોલ છવાયો હતો. લગ્નના થોડા કલાકો પહેલાં જ મિતેશના મૃત્યુથી બધું બદલાઈ ગયું હતું, જ્યાં ઢોલ વગાડાતા હતા ત્યાં માતમ છવાયો હતો.