✕

હવે વુલન ટોટ બૅગ્સનો જમાનો

20 November, 2026 02:48 PM IST  |  Mumbai | Gujarati Mid-day Correspondent

સામાન્ય લેધર બૅગ્સના બદલે અત્યારે જાડા વુલન થ્રેડ, હૅન્ડ-નિટેડ ફૅબ્રિકવાળી મોટી ટોટ બૅગ્સ ખૂબ જ લોકપ્રિય થઈ રહી છે. એ તમારાં ગરમ કપડાં જેવાં કે સ્વેટર કે શૉલ સાથે પર્ફેક્ટલી મૅચ થાય છે અને વિન્ટર લુકને વધારે આકર્ષક બનાવે છે

વુલન ટોટ બૅગ્સ

શિયાળાની ગુલાબી ઠંડી શરૂ થતાં જ માત્ર આપણો વૉર્ડરોબ નથી બદલાતો, આપણી ઍક્સેસરીઝની પસંદગી પણ બદલાઈ જાય છે. ક્લાસિક લેધર બૅગ્સના સ્થાને હવે જાડા વુલન થ્રેડ, હૅન્ડ-નિટેડ ફૅબ્રિકવાળી મોટી ટોટ બૅગ્સ ખૂબ ટ્રેન્ડમાં છે. આ બૅગ્સ માત્ર દેખાવમાં જ સુંદર નથી, શિયાળાના આરામદાયક વાતાવરણ સાથે એક અનોખી કમ્ફર્ટ અને સ્ટાઇલ-સ્ટેટમેન્ટ પણ આપે છે.

જાડા ઊનના દોરાથી તૈયાર થયેલી હૅન્ડ-નિટેડ કે ક્રોશે ટોટ બૅગ્સ અત્યારે ઇન્સ્ટાગ્રામથી લઈને હાઈ-સ્ટ્રીટ ફૅશન સુધી છવાયેલી છે. આ બૅગ્સનું સૉફ્ટ ટેક્સ્ચર શિયાળાના વાતાવરણને બિલકુલ અનુરૂપ છે. જ્યારે તમે ઓવરસાઇઝ્ડ સ્વેટર, લૉન્ગ કોટ કે કાર્ડિગન પહેરો છો ત્યારે એની સાથે લેધરની કડક બૅગ કરતાં આ વુલન બૅગ્સ વધારે સૉફ્ટ અને એલિગન્ટ લુક આપે છે. એનો મોટો ફાયદો એ છે કે એ વજનમાં ખૂબ જ હળવી હોય છે.

વિન્ટરવેઅર સાથે પર્ફેક્ટ મૅચિંગ

શિયાળામાં આપણે જે શૉલ, પશ્મીના સ્કાર્ફ કે હેવી વુલન કુરતીઓ પહેરીએ છીએ એની સાથે લેધર બૅગ ઘણી વાર મૅચ થતી નથી અથવા લુકને વધુ પડતો ફૉર્મલ બનાવી દે છે. એના બદલે જ્યારે તમે આ એમ્બ્રૉઇડરી કે નિટેડ બૅગ્સ કૅરી કરો છો ત્યારે એ તમારા વિન્ટરવેઅર સાથે પર્ફેક્ટ્લી બ્લેન્ડ થઈ જાય છે. ખાસ કરીને બ્રાઉન, બેજ, મસ્ટર્ડ, ઑલિવ ગ્રીન કે મરૂનમાં મળતી આ બૅગ્સ વિન્ટર લુકમાં એક કલર પૉપ અથવા ક્લાસી મૉનોક્રોમ ઇફેક્ટ લાવે છે.

દેખાવમાં સુંદર, વાપરવામાં બેસ્ટ

ટોટ બૅગ્સ એની વિશાળ સાઇઝ માટે જાણીતી છે. શિયાળામાં આપણે જ્યારે બહાર જઈએ ત્યારે નાની બૅગ્સ કામ નથી આવતી; કારણ કે આપણે સ્કાર્ફ, ગ્લવ્ઝ, મૉઇશ્ચરાઇઝર કે થર્મસ, બૉટલ જેવી ઘણી બધી વસ્તુઓ સાથે રાખવી પડે છે. આ મોટી વુલન ટોટ બૅગ્સ સ્ટાઇલિશ હોવાની સાથે-સાથે વધુ સ્પેસ પણ ધરાવતી હોય છે. ઑફિસ-ગોઇંગ વુમન કે કૉલેજ-ગર્લ્સ માટે આ બૅગ્સમાં લૅપટૉપથી લઈને પર્સનલ કૅરની તમામ વસ્તુઓ આરામથી સમાઈ જાય છે.

ઇકો-ફ્રેન્ડ્લી અને સસ્ટેનેબલ ફૅશન

આજના સમયમાં પર્યાવરણને અનુકૂળ ફૅશનનો ક્રેઝ વધ્યો છે. લેધર બૅગ્સ બનાવવા માટે કેમિકલ્સનો ઉપયોગ થાય છે, જ્યારે હૅન્ડ-નિટેડ આ બૅગ્સ સંપૂર્ણપણે ઇકો-ફ્રેન્ડ્લી હોય છે.

જો તમે આ શિયાળામાં બોરિંગ અને રેગ્યુલર લેધર લુકથી કંટાળી ગયા છો અને કંઈક નવું ટ્રાય કરવા માગો છો તો હૅન્ડ-નિટેડ ટોટ બૅગ્સ તમારા કલેક્શનમાં ચોક્કસ સામેલ કરો. એ તમારી ઑફિસ હોય, સાંજની કૅઝ્યુઅલ કૉફી-ડેટ હોય કે કોઈ ફંક્શન; તમને ભીડથી અલગ અને અત્યંત સ્ટાઇલિશ વિન્ટર લુક આપશે.

fashion news fashion columnists gujarati mid day lifestyle news life and style