24 August, 2026 01:04 PM IST | Mumbai | Gujarati Mid-day Correspondent
અમિતાભ બચ્ચન
બૉલીવુડમાં અમિતાભ બચ્ચનની પંક્ચ્યુઅલિટીની મિસાલ આપવામાં આવે છે, પણ વર્ષો પહેલાં એક સમયે એવું પણ બન્યું હતું કે તેમને સેટ પર મોડા આવવા બદલ કાઢી મૂકવામાં આવ્યા હતા. તાજેતરમાં અમિતાભ બચ્ચને ‘કૌન બનેગા કરોડપતિ’માં કૉમનવેલ્થ ગેમ્સ 2026ના વિજેતાઓ સાથે વાતચીત કરી હતી. આ દરમ્યાન અમિતાભે પોતાના સંઘર્ષના દિવસોને યાદ કર્યા અને જણાવ્યું કે શરૂઆતના સમયમાં તેમને તેમની ઊંચાઈને લઈને ઘણી ટીકાઓનો સામનો કરવો પડ્યો હતો એટલું જ નહીં, એક વખત શૂટિંગના સેટ પર મોડા પહોંચવા બદલ ડિરેક્ટરે તેમને ઠપકો આપીને સેટ પરથી કાઢી મૂક્યો હતો.
આ સમગ્ર ઘટનાક્રમ વિશે વાત કરતાં અમિતાભે કહ્યું હતું કે ‘હું સામાન્ય રીતે શૂટિંગના સ્થળે સમયસર પહોંચવાનો પ્રયાસ કરતો હતો, પણ એક વખત હું મોડો પડી ગયો હતો. એ સમયે મારી પાસે મારી પોતાની કાર પણ નહોતી એટલે હું કોઈ બીજી વ્યક્તિની કારમાં સેટ પર પહોંચ્યો હતો. જ્યારે હું ત્યાં પહોંચ્યો ત્યારે ડિરેક્ટર સેટની બહાર ઊભો હતો. મને જોઈને જ ડિરેક્ટરે કહ્યું કે શૂટિંગ પૅકઅપ થઈ ગયું છે અને હવે મારે સેટ પરથી જતા રહેવું જોઈએ. આમ શૂટિંગમાં મોડા પહોંચવાને કારણે મને સેટ પરથી ગેટ-આઉટ કહી દેવામાં આવ્યું હતું.’
