મણિપુરી ફિલ્મ બૂંગને મળ્યો BAFTAમા અવૉર્ડ, નરેન્દ્ર મોદીને આપ્યાં અભિનંદન

એક્સેલ એન્ટરટેઇનમેન્ટના બૅનર હેઠળ બનેલી આ મૂવીને બેસ્ટ ચાઇલ્ડ ઍન્ડ ફૅમિલી ફિલ્મની કૅટેગરીમાં નવાજવામાં આવી

ફિલ્મ `બૂંગ`નો સીન

આ વર્ષનો બ્રિટિશ ઍકૅડેમી ઑફ ફિલ્મ ઍન્ડ ટેલિવિઝન આર્ટ્સ (BAFTA) અવૉર્ડ્‌સ એક રીતે ભારત માટે વધુ ખાસ રહ્યો છે. આ પુરસ્કાર વિશ્વના પ્રતિષ્ઠિત ફિલ્મ અને ટેલિવિઝન સન્માનોમાં ગણાય છે. આ વર્ષે BAFTA અવૉર્ડ્‌સમાં ફરહાન અખ્તર અને રિતેશ સિધવાણીના એક્સેલ એન્ટરટેઇનમેન્ટના બૅનર હેઠળ બનેલી મણિપુરી ફિલ્મ ‘બૂંગ’ને ‘બેસ્ટ ચાઇલ્ડ ઍન્ડ ફૅમિલી ફિલ્મ’નો અવૉર્ડ મળ્યો છે. આ ફિલ્મનું ડિરેક્શન લક્ષ્મીપ્રિયા દેવીએ કર્યું છે. બાળકો અને પરિવારોને કેન્દ્રમાં રાખીને બનેલી આ ભાવનાત્મક ફિલ્મ માનવીય સંબંધો અને સંવેદનાઓને સ્પર્શે છે. ‘બૂંગ’ BAFTA અવૉર્ડ્‌સમાં નામાંકિત થયેલી એકમાત્ર ભારતીય ફિલ્મ હતી અને એણે આંતરરાષ્ટ્રીય સ્તરની મોટી ફિલ્મોને પાછળ રાખીને આ સન્માન મેળવ્યું. આ જીતથી મણિપુરી સિનેમાને વૈશ્વિક સ્તરે નવી ઓળખ મળી છે અને મણિપુર જેવા રાજ્યની વાર્તાઓને આંતરરાષ્ટ્રીય પ્રશંસા મળી રહી છે.

વડા પ્રધાન નરેન્દ્ર મોદીએ ગઈ કાલે આ સિદ્ધિ બદલ ‘બૂંગ’ની ટીમને અભિનંદન પાઠવ્યાં છે. તેમણે આ સિદ્ધિ નિમિત્તે સોશ્યલ મીડિયા પર ખાસ સંદેશ શૅર કરીને ખુશી વ્યક્ત કરી છે. વડા પ્રધાને પોતાના સંદેશમાં લખ્યું કે ‘ફિલ્મ સાથે જોડાયેલા તમામ લોકોને હાર્દિક અભિનંદન. આ મણિપુર માટે અત્યંત ગૌરવની ક્ષણ છે અને દેશની વિશાળ સર્જનાત્મક પ્રતિભાને પણ ઉજાગર કરે છે. આવી સફળતાઓ ભારતની સાંસ્કૃતિક વૈવિધ્યતા અને પ્રતિભાને વૈશ્વિક મંચ પર મજબૂત ઓળખ અપાવે છે.’