05 December, 2021 03:14 PM IST | Mumbai | Gujarati Mid-day Correspondent
કમલ હાસન
કમલ હાસનને હૉસ્પિટલમાંથી ડિસ્ચાર્જ મળ્યા બાદ તેમણે સૌનો આભાર માન્યો છે. તેમને કોરોના થતાં ચેન્નઈના શ્રી રામચન્દ્ર મેડિકલ સેન્ટરમાં તેમની સારવાર ચાલી રહી હતી. કમલ હાસને હૉસ્પિટલના નર્સિંગ સ્ટાફ અને ડૉક્ટરનો આભાર માન્યો છે. સાથે જ તેમણે તામિલનાડુના મુખ્ય પ્રધાન એમ. કે. સ્ટાલિન, રજનીકાન્ત, સંગીતકાર ઇલિયારાજા, સાઉથના ઍક્ટર્સ, તેમની આગામી ફિલ્મ ‘વિક્રમ’ના ડિરેક્ટર લોકેશનો આભાર માન્યો છે. તેમણે સાઉથના ‘બિગ બૉસ’ના યુનિટનો પણ સાથ-સહકાર આપવા બદલ આભાર માન્યો છે. કમલ હાસને કહ્યું કે ‘મારા ભાઈ મહેન્દ્રન અને મારી ટીમનો દિલથી આભાર જેમણે મારી કાળજી લેવા માટે જમવાનું અને ઊંઘ છોડી દીધી હતી. તામિલના લાખો લોકોનો પણ હું દિલથી ધન્યવાદ વ્યક્ત કરું છું જેમણે મને પોતાનો સમજ્યો, મારા માટે આંસુ વહાવ્યાં અને મારા માટે પ્રાર્થના કરી. મને જાણ નહોતી કે પ્રાર્થનામાં અસર હોય છે. જોકે હા પ્રેમમાં તકાત હોય છે. હું કોરોનામાંથી બહાર આવી ગયો તો એ તમારો પ્રેમ નહોતો તો શું હતું?’