29 November, 2021 01:31 PM IST | Mumbai | Gujarati Mid-day Correspondent
ફિલ્મ જગતમાં જે પરિવર્તન આવ્યું છે એ વિશે માધુરીએ વાત કરી હતી
માધુરી દીક્ષિત નેનેનું કહેવું છે કે મહિલાઓ ફિલ્મોમાં આવે એનો હાલ સારો તબક્કો છે. ઇન્ટરનૅશનલ ફિલ્મ ફેસ્ટિવલ ઑફ ઇન્ડિયાના સમાપન સમારોહમાં માધુરીએ હાજરી આપી હતી. એ દરમ્યાન ફિલ્મ જગતમાં આપેલા યોગદાન બદલ તેને સન્માનિત કરવામાં આવી હતી. ફિલ્મ જગતમાં જે પરિવર્તન આવ્યું છે એ વિશે માધુરીએ કહ્યું હતું કે ‘ઘણાંબધાં પરિવર્તન આવ્યાં છે, પરંતુ જે મોટું પરિવર્તન આવ્યું છે એ એ છે કે જ્યારે હું શરૂઆતમાં શૂટિંગ પર જતી તો મહિલાઓ સેટ પર કાં તો ઍક્ટર્સ હતી કાં તો હેરડ્રેસર રહેતી હતી. આજે હું જ્યારે સેટ પર જાઉં છું તો મહિલાઓ દરેક ડિપાર્ટમેન્ટમાં જોવા મળે છે. તે અસિસ્ટન્ટ ડિરેક્ટર્સ, ડિરેક્ટર્સ, કૅમેરા વુમન અથવા તો રાઇટર્સ છે. એ જોઈને સારું લાગે છે કે ચાલો આપણે પ્રગતિ કરી રહ્યા છીએ. ફિલ્મો પણ મહિલાઓ માટે સારી બની રહી છે. મને લાગે છે કે ફિલ્મોમાં આવવા માટે મહિલાઓ માટે આ સારો સમય છે. આ જ સૌથી મોટું પરિવર્તન આવ્યું છે.’