20 September, 2021 08:13 PM IST | Mumbai | Gujarati Mid-day Online Correspondent
ફાઇલ ફોટો
રોયલ ચેલેન્જર્સ બેંગ્લોર (RCB) આજે કોલકાતા નાઈટ રાઈડર્સ (KKR) સામે મેદાનમાં ઉતરશે, ત્યારે કેપ્ટન વિરાટ કોહલી તે જ સમયે ઈતિહાસ રચવા જઈ રહ્યા છે. વિરાટ કોહલી અબુ ધાબીના શેખ ઝાયદ સ્ટેડિયમમાં મેચ માટે મેદાનમાં ઉતરશે કે તરત જ તે એક ખાસ બેવડી સદી પણ પૂરી કરશે. આ ખાસ સદી એવી હશે, જે આજ સુધી કોઈ ખેલાડીએ બનાવી નથી.
ખરેખર, જમણા હાથના બેટ્સમેન વિરાટ કોહલી આજે IPL માં પોતાની 200મી મેચ રમશે. આ રીતે, તે એક ખાસ બેવડી સદી પૂરી કરવા જઈ રહ્યો છે અને આ સમય દરમિયાન એક ઇતિહાસ પણ લખવામાં આવશે, કારણ કે આ પહેલા કોઇ પણ ખેલાડીએ એક ફ્રેન્ચાઇઝી માટે લીગમાં આટલી મેચ રમી નથી. વિરાટ કોહલી રોયલ ચેલેન્જર્સ બેંગ્લોર એટલે કે આરસીબી માટે આ કરવા જઈ રહ્યો છે. તે 2008થી IPL ટીમ RCBનો ભાગ છે.
વિરાટ કોહલી પહેલા, એમએસ ધોની, રોહિત શર્મા, દિનેશ કાર્તિક અને સુરેશ રૈના આઈપીએલમાં 200 કે તેથી વધુ મેચ રમી ચૂક્યા છે, પરંતુ એવો કોઈ ખેલાડી નથી કે જે એક ફ્રેન્ચાઈઝી માટે આટલી બધી મેચો રમ્યો હોય કારણ કે ધોની, રોહિત, કાર્તિક અને રૈના જુદી-જુદી- ફ્રેન્ચાઈઝી માટે પણ રમી ચૂક્યા છે. એટલું જ નહીં, તે પોતાનામાં એક વર્લ્ડ રેકોર્ડ છે કે કોઈ એક ફ્રેન્ચાઈઝી માટે એક જ ટુર્નામેન્ટમાં 200 મેચ રમવા જઈ રહ્યું છે.
વિરાટ કોહલીની IPL કારકિર્દીની વાત કરીએ તો તેણે અત્યાર સુધી રમાયેલી 199 મેચોમાં 6076 રન બનાવ્યા છે, જેમાં 5 સદીનો સમાવેશ થાય છે. વિરાટ કોહલીએ આ લીગમાં 40 અર્ધસદી પણ ફટકારી છે. 26 મેચમાં વિરાટ કોહલીએ પણ બોલિંગમાં હાથ અજમાવ્યો છે, પરંતુ તેને માત્ર 4 વિકેટ મળી હતી. આ જ કારણ છે કે તે હવે નેટ્સમાં ક્યારેક ક્યારેક બોલિંગ કરતો જોવા મળે છે. વિરાટ મધ્યમ ગતિનો બોલર છે.