કોહલી થર્ડ ઓપનર, પણ મારો પહેલો પાર્ટનર રાહુલ જ : રોહિત

તાજેતરના એશિયા કપમાં અફઘાનિસ્તાન સામે કોહલી-રાહુલની જોડી ઓપનિંગમાં રમી હતી

કે એલ રાહુલ

આવતી કાલે ઘરઆંગણે ઑસ્ટ્રેલિયા સામે શરૂ થતી ત્રણ મૅચની ટી૨૦ સિરીઝ પહેલાં ભારતની ઓપનિંગ જોડી બાબતમાં થોડા દિવસમાં ઘણી ચર્ચા થઈ છે, પરંતુ કૅપ્ટન રોહિત શર્માએ ગઈ કાલે કરેલા ખુલાસા પછી હવે આ ચર્ચા બંધ થઈ જશે. તેણે પત્રકારો સાથેની વાતચીતમાં કહ્યું કે ‘ઓપનિંગ માટે ઘણા વિકલ્પો હોય એ કોને ન ગમે? વિરાટ કોહલી ભારતનો ત્રીજો ઓપનિંગ બૅટર છે અને એ વિશે મેં અમુક મૅચોમાં તે ઓપનિંગમાં રમશે એવું કહ્યું છે, પરંતુ મારા ઓપનિંગ પાર્ટનર તરીકે પહેલી પસંદગી તો કે. એલ. રાહુલ જ છે અને તે જ મારી સાથે દાવની શરૂઆત કરશે. ટીમમાં કોનો શું રોલ હશે એ વિશે ટીમ-મૅનેજમેન્ટનો અભિગમ એકદમ સ્પષ્ટ છે.’

તાજેતરના એશિયા કપમાં અફઘાનિસ્તાન સામે કોહલી-રાહુલની જોડી ઓપનિંગમાં રમી હતી. કોહલીએ ૬૧ બૉલમાં છ સિક્સર, ૧૨ ફોરની મદદથી અણનમ ૧૨૨ રન બનાવ્યા હતા. ઑસ્ટ્રેલિયા સામેની ટી૨૦ મૅચો ૨૦, ૨૩, ૨૫ તારીખે રમાશે.