IPLના દર્શકો માટે સારા સમાચાર, હવે નહીં આવશે આવી જાહેરાતો: સરકારે આપ્યો નિર્દેશ

IPL 2025: ગોયલે ઉમેર્યું કે ક્રિકેટરોની જાહેર આરોગ્યને પ્રોત્સાહન આપવાની નૈતિક જવાબદારી છે. "સ્વસ્થ, સક્રિય જીવનશૈલીને પ્રોત્સાહન આપવા માટે ક્રિકેટ ખેલાડીઓ યુવાનો માટે રોલ મોડેલ છે, IPL દેશનું સૌથી મોટું સ્પોર્ટ્સ પ્લેટફોર્મ છે.

પ્રતીકાત્મક તસવીર સૌજન્ય મિડ-ડે

દુબઈમાં ગઈ કાલે આઇસીસી ચેમ્પિયન્સ ટ્રૉફી 2025ની ફાઇનલ મૅચ પૂર્ણ થઈ, જેમાં ભારતે ત્રીજી વખત આ ખિતાબ પોતાના નામે કર્યો છે. આ ક્રિકેટ ટુર્નામેન્ટ પૂર્ણ થયા બાદ હવે 22 માર્ચથી હવે ઇન્ડિયન પ્રીમિયર લીગના 18માં સિઝનની શરૂઆત થવાની છે. જોકે તે પહેલા આઇપીએલ 2025 ને એક મોટો ફટકો લાગ્યો છે. કારણ કે દેશના આરોગ્ય મંત્રાલય દ્વારા મૅચ દરમિયાન આવતી અમુક જાહેરાતો પર પૂર્ણપણે પ્રતિબંધ મૂકવાનો નિર્દેશ આપ્યો છે. આ નિર્ણયને લીધે હવે આઇપીએલની જાહેરાત મારફત આવતી આવક ઓછી થવાની શક્યતા છે.

આરોગ્ય મંત્રાલયે ઇન્ડિયન પ્રીમિયર લીગ (IPL) ને તમાકુ અને દારૂના પ્રમોશન સંબંધિત તમામ પ્રકારની જાહેરાતો પર પ્રતિબંધ મૂકવાનો નિર્દેશ આપ્યો છે. IPL 2025 22 માર્ચથી શરૂ થવા જઈ રહી છે. IPL ચૅરમૅન અરુણ ધુમલને લખેલા પત્રમાં, આરોગ્ય સેવાઓના ડિરેક્ટર જનરલ અતુલ ગોયલે જણાવ્યું હતું કે દેશના યુવાનો માટે રોલ મોડેલ એવા ક્રિકેટરોએ તમાકુ અથવા દારૂના પ્રમોશનમાં પ્રત્યક્ષ કે પરોક્ષ રીતે સામેલ થવું જોઈએ નહીં.

"IPL એ સ્ટેડિયમ્સ જ્યાં ક્રિકેટ મૅચ અને IPL સંબંધિત મૅચ કે ઇવેન્ટ્સ યોજવામાં આવે છે, તેમજ રાષ્ટ્રીય ટેલિવિઝન પર તેને ટેલિકાસ્ટ કરવામાં આવે છે, તે દરમિયાન સરોગેટ જાહેરાતો સહિત, તમામ પ્રકારની તમાકુ, દારૂની જાહેરાતો પર પ્રતિબંધ મૂકતા નિયમોનો કડક અમલ કરવો જોઈએ," ગોયલે પત્રમાં લખ્યું. "તમામ સંલગ્ન ઇવેન્ટ્સ અને રમતગમત સુવિધાઓમાં તમાકુ અને દારૂ ઉત્પાદનોનું વેચાણ થાય છે. મૅચ દરમિયાન કૉમેન્ટરી કરનાર અને રમનાર ખેલાડીઓના પ્રમોશનને નિરુત્સાહિત કરો જેઓ દારૂ અથવા તમાકુના પ્રોડક્ટ્સની જાહેરાત કરવા સાથે સીધા કે આડકતરી રીતે જોડાયેલા છે અને ઉત્પાદનોને પ્રત્યક્ષ કે પરોક્ષ રીતે સમર્થન આપે છે," પત્રમાં જણાવાયું છે.

જ્યારે IPL સીઝન શરૂ થાય છે, ત્યારે મોટાભાગના લોકો તેમના ટેલિવિઝન સેટ પર ચોંટી જાય છે, જે જાહેરાતકર્તાઓ માટે આ ક્રિકેટ ટુર્નામેન્ટને તેમના પ્રોડક્ટને પ્રમોટ કરવા માટે સૌથી પ્રિય બનાવે છે. "ભારત બિન-સંચારી રોગો હૃદયરોગ, કૅન્સર, ક્રોનિક ફેફસાના રોગ, ડાયાબિટીસ, હાયપરટેન્શન વગેરેનો નોંધપાત્ર બોજ અનુભવી રહ્યું છે જે વાર્ષિક 70 ટકાથી વધુ મૃત્યુ માટે જવાબદાર છે. તમાકુ અને દારૂનો ઉપયોગ NCDs માટે મુખ્ય જોખમ પરિબળો છે. વિશ્વભરમાં તમાકુ સંબંધિત મૃત્યુમાં આપણે બીજા ક્રમે છીએ. દર વર્ષે લગભગ ૧૪ લાખ લોકો મૃત્યુ પામે છે, જ્યારે દારૂ એ ભારતીયો દ્વારા ઉપયોગમાં લેવાતો સૌથી સામાન્ય માદક પદાર્થ છે," ગોયલે આગળ જણાવ્યું.

ગોયલે ઉમેર્યું કે ક્રિકેટરોની જાહેર આરોગ્યને પ્રોત્સાહન આપવાની નૈતિક જવાબદારી છે. "સ્વસ્થ, સક્રિય જીવનશૈલીને પ્રોત્સાહન આપવા માટે ક્રિકેટ ખેલાડીઓ યુવાનો માટે રોલ મોડેલ છે, IPL દેશનું સૌથી મોટું સ્પોર્ટ્સ પ્લેટફોર્મ છે, જાહેર આરોગ્યને પ્રોત્સાહન આપવાની અને સરકારની આરોગ્ય પહેલને ટેકો આપવાની સામાજિક અને નૈતિક જવાબદારી ધરાવે છે," ગોયલે ઉમેર્યું.