16 December, 2019 09:36 AM IST | Telangana
સિકંદરાબાદ રેલવે સ્ટેશન પર હવામાંથી તૈયાર કરાયેલું પાણી મળશે
તેલંગણના સિકંદરાબાદ રેલવે સ્ટેશનના એક નંબરના પ્લૅટફૉર્મ પર હવામાંથી તૈયાર કરવામાં આવેલું પાણી વેચવામાં આવી રહ્યું છે. જલ શક્તિ મંત્રાલયે આ ટેક્નિકથી તૈયાર કરવામાં આવેલા પાણીને સ્વાસ્થ્ય માટે સુરક્ષિત જાહેર કરતાં સાઉથ સેન્ટ્રલ રેલવે (એસસીઆર)એ ગુરુવારે પાણીનું કિઑસ્ક ઇન્સ્ટૉલ કર્યું હતું. આ કિઑસ્કનું ઑટોમૅટિક વૉટર જનરેટર રોજના ૧૦૦૦ લીટર પાણી બનાવે છે જે સ્ટીલની એક ટૅન્કમાં જમા થાય છે.
આ પણ વાંંચો : મિનેસોટાના એક ટીનેજરની મોંફાડ છે રેકૉર્ડબ્રેક 3.37 ઇંચ
એસસીઆરના અધિકારીઓએ જણાવ્યા મુજબ પર્યાવરણને અનુકૂળ આ મશીન પાણીના કોઈ સ્રોત પર નિર્ભર નથી, વેસ્ટ ઉત્પન્ન કરતો નથી તેમ જ દરેક ઋતુમાં કામ કરે છે. હવામાંથી પાણી શોષીને અનેક તબક્કામાંથી પસાર થયા બાદ પાણી ટૅન્કમાં જમા થાય છે. મેઘદૂત ટેક્નિકથી તૈયાર કરવામાં આવેલા આ પાણીની બૉટલ સાથેની કિંમત આઠ રૂપિયા ઠરાવાઈ છે, જ્યારે ગ્રાહક પોતાની બૉટલમાં પાંચ રૂપિયામાં પાણી ભરાવી શકે છે.