રાજ્યમાં રાજ અને ઉદ્ધવ ઠાકરેના હિન્દી સામે વિરોધ પર શરદ પાવરનું શું છે વલણ?

એનસીપીના વડા શરદ પવારે કહ્યું, “પ્રાથમિક સ્તરે, બાળકના વિકાસ માટે માતૃભાષા મહત્ત્વપૂર્ણ છે. ધોરણ ૧ થી ૪ સુધી હિન્દીને ફરજિયાત બનાવવી તે બાબત વિદ્યાર્થીઓના શ્રેષ્ઠ હિતમાં નથી. ધોરણ ૫ પછી પણ, કોઈપણ ભાષા ફરજિયાતપણે લાદવી યોગ્ય નથી.

રાજ ઠાકરે શરદ પવાર અને ઉદ્ધવ ઠાકરે (તસવીર: મિડ-ડે)

મહારાષ્ટ્રની મહાયુતિ સરકાર દ્વારા ધોરણ ૧ થી ૫ ના વિદ્યાર્થીઓ માટે ભણતરમાં હિન્દીને ફરજિયાત ત્રીજી ભાષા બનાવવાના વિવાદાસ્પદ પગલાના વિરોધમાં NCP (શરદચંદ્ર પવાર) ના પ્રમુખ શરદ પવારે શુક્રવારે ઉદ્ધવ ઠાકરે અને રાજ ઠાકરેને ટેકો આપવાની જાહેરાત કરી છે. શરદ પવારે કહ્યું કે મહારાષ્ટ્રના લોકો હિન્દી વિરોધી નથી, પરંતુ તેમણે કહ્યું કે નાના બાળકો પર ભાષા ફરજિયાત કરવી અયોગ્ય છે અને માતૃભાષાના મહત્ત્વને ઓછું કરે છે.

પત્રકારો સાથે એક પરિષદમાં વાત કરતા, એનસીપીના વડા શરદ પવારે કહ્યું, “પ્રાથમિક સ્તરે, બાળકના વિકાસ માટે માતૃભાષા મહત્ત્વપૂર્ણ છે. ધોરણ ૧ થી ૪ સુધી હિન્દીને ફરજિયાત બનાવવી તે બાબત વિદ્યાર્થીઓના શ્રેષ્ઠ હિતમાં નથી. ધોરણ ૫ પછી પણ, કોઈપણ ભાષા ફરજિયાતપણે લાદવી યોગ્ય નથી. તે એવી રીતે રજૂ થવી જોઈએ કે બાળકો સ્વેચ્છાએ અને અર્થપૂર્ણ રીતે શીખી શકે.”

હિન્દી ફરજિયાત કરવાનો વિરોધ કરવા બદલ પવારે રાજ ઠાકરેની પ્રશંસા કરી

મરાઠી ભાષા અને ઓળખ માટે ઉભા રહેવા બદલ શરદ પવારે ઉદ્ધવ અને રાજ ઠાકરે બન્નેની પ્રશંસા કરી, કહ્યું કે તેઓ ટૂંક સમયમાં મુંબઈમાં તેમને મળશે અને આ મુદ્દા પર ચર્ચા કરશે અને સંયુક્ત કાર્યવાહી પર વિચાર કરશે. "બન્ને ઠાકરેએ મજબૂત વલણ અપનાવ્યું છે. જો તેઓ ઇચ્છે છે કે બધા રાજકીય પક્ષો વિરોધમાં જોડાય, તો આપણે તેમની વિગતવાર યોજના સમજવી જોઈએ. હું ટૂંક સમયમાં તેમની સાથે મળીશ," પવારે આ નિર્ણય સામે સંભવિત વિપક્ષી એકતાનો સંકેત આપતા કહ્યું.

રાજ્ય સરકારના સુધારેલા આદેશની વ્યાપક ટીકા થઈ છે. તેમાં જણાવાયું છે કે મરાઠી અને અંગ્રેજી માધ્યમની શાળાઓમાં હિન્દીને સામાન્ય રીતે ત્રીજી ભાષા તરીકે શીખવવામાં આવશે. વિદ્યાર્થીઓ અન્ય ભારતીય ભાષાઓ પસંદ કરી શકે છે, પરંતુ જો ઓછામાં ઓછા 20 વિદ્યાર્થીઓ રસ દાખવે તો જ. ટીકાકારોનો મત છે કે આ નીતિગત સુધારાના આડમાં પ્રાદેશિક ભાષાઓને બાજુ પર રાખવાનો માર્ગ મોકળો કરે છે.

શિવસેના (UBT) અને MNS બન્નેએ આ પગલાને ‘ભાષા કટોકટી’ લાદવાનો અને શાળાઓમાં ‘મરાઠી-માનસિકતાને ખતમ કરવાનો પ્રયાસ ગણાવ્યો છે. ઉદ્ધવ ઠાકરેએ 7 જુલાઈએ વિરોધ પ્રદર્શનની જાહેરાત કરી છે, જ્યારે રાજ ઠાકરે 5 જુલાઈએ એક કાર્યક્રમ યોજવાની જાહેરાત કરી છે. ગુરુવારે અલગ અલગ પ્રેસ કોન્ફરન્સમાં, તેઓએ મરાઠીના ભોગે હિન્દી લાદવાના કોઈપણ પ્રયાસનો પ્રતિકાર કરવાની પ્રતિજ્ઞા લીધી.

મહારાષ્ટ્ર નવનિર્માણ સેના (મનસે) ના પ્રમુખ રાજ ઠાકરેએ રાજ્યમાં હિન્દી ભાષા લાદવા અને શાળાઓમાં ત્રણ ભાષાનું ફોર્મ્યુલા લાગુ કરવાના સરકારના પગલાનો કડક વિરોધ કરવાની જાહેરાત કરી છે, જે તેમના મતે મહારાષ્ટ્રની મરાઠી ઓળખને નબળી પાડે છે. ગુરુવારે એક પત્રકાર પરિષદને સંબોધતા, ઠાકરેએ સ્પષ્ટ કર્યું કે તેમનો પક્ષ રાજ્યમાં મરાઠીને હિન્દી અથવા અન્ય કોઈપણ ભાષા સાથે બદલવાના કોઈપણ પ્રયાસને સહન કરશે નહીં.