08 June, 2025 06:55 AM IST | Mumbai | Gujarati Mid-day Online Correspondent
રાહુલ ગાંધી ફાઇલ તસવીર (સૌજન્ય: મિડ-ડે)
લોકસભામાં વિપક્ષના નેતા રાહુલ ગાંધીએ મહારાષ્ટ્રમાં યોજાયેલી વિધાનસભા ચૂંટણીમાં મેચ ફિક્સિંગનો આરોપ લગાવ્યો હતો. કૉંગ્રેસના નેતાના નિવેદન પર પ્રતિક્રિયા આપતા ચૂંટણી પંચે ભારે નારાજગી વ્યક્ત કરી છે. ચૂંટણી પંચે કહ્યું, `મહારાષ્ટ્રની મતદાર યાદી સામે ઉઠાવવામાં આવેલા પાયાવિહોણા આરોપો કાયદાના શાસનનું અપમાન છે. ચૂંટણી પંચે 24 ડિસેમ્બર 2024 ના રોજ કૉંગ્રેસને આપેલા જવાબમાં તમામ તથ્યો સ્પષ્ટ કર્યા હતા, જે પંચની વેબસાઇટ પર ઉપલબ્ધ છે. એવું લાગે છે કે તથ્યોને સંપૂર્ણપણે અવગણીને આવા મુદ્દાઓ વારંવાર ઉઠાવવામાં આવી રહ્યા છે.;
રાહુલ ગાંધીના નિવેદન પર ચૂંટણી પંચે વધુમાં કહ્યું કે, `કોઈપણ દ્વારા ફેલાવવામાં આવતી ખોટી માહિતી કાયદાના અનાદરનું પ્રતીક છે. ઉપરાંત, તે તેમના રાજકીય પક્ષ દ્વારા નિયુક્ત કરાયેલા હજારો પ્રતિનિધિઓને બદનામ કરે છે. આવી ખોટી માહિતી ચૂંટણી દરમિયાન પારદર્શક રીતે કામ કરતા લાખો ચૂંટણી કાર્યકરોનું મનોબળ ઘટાડી નાખે છે. મતદારોના કોઈપણ પ્રતિકૂળ નિર્ણય પછી, ચૂંટણી પંચ સાથે ચેડા થયાનું કહીને તેને બદનામ કરવાનો પ્રયાસ સંપૂર્ણપણે વાહિયાત છે.`
રાહુલ ગાંધીનો આરોપ શું છે
રાહુલ ગાંધીએ આરોપ લગાવ્યો કે 2024ની મહારાષ્ટ્ર વિધાનસભા ચૂંટણીઓ લોકશાહીમાં ગોટાળા કરવા માટે એક બ્લુપ્રિન્ટ હતી. તેમણે કહ્યું કે આ મેચ ફિક્સિંગ હવે બિહારમાં પુનરાવર્તન કરવામાં આવશે અને પછી તે સ્થળોએ પણ આવું જ કરવામાં આવશે જ્યાં ભારતીય જનતા પાર્ટી હારી રહી છે. તેમણે ભારપૂર્વક જણાવ્યું કે મેચ ફિક્સ્ડ ચૂંટણીઓ લોકશાહી માટે ઝેર છે. તેમણે કહ્યું કે જે પાર્ટી છેતરપિંડી કરે છે તે જીતી શકે છે, પરંતુ તે લોકશાહી સંસ્થાઓને નબળી પાડે છે અને જનતા સરકારમાં વિશ્વાસ ગુમાવે છે. સોશિયલ મીડિયા પ્લેટફોર્મ X પર પોસ્ટ કરતા રાહુલ ગાંધીએ આરોપ લગાવ્યો કે, `ચૂંટણીમાં કથિત ગેરરીતિઓ પગલું દ્વારા પગલું સમજાવવામાં આવી છે, કેવી રીતે નકલી મતદારોને મતદાર યાદીમાં ઉમેરવામાં આવ્યા, મતદાનની ટકાવારી વધારી દેવામાં આવી, નકલી મતદાન કરવામાં આવ્યું અને બાદમાં પુરાવા છુપાવવામાં આવ્યા.`
તાજેતરમાં જ, કૉંગ્રેસના સાંસદ અને લોકસભામાં વિપક્ષના નેતા રાહુલ ગાંધીએ ભોપાલમાં એક જાહેર સભાને સંબોધિત કરતી વખતે વડા પ્રધાન નરેન્દ્ર મોદી અને ભાજપ-આરએસએસ પર જોરદાર નિશાન સાધ્યું. રાહુલે યુદ્ધવિરામ અંગે પીએમ મોદી પર કટાક્ષ કર્યો. તેમણે કહ્યું કે ટ્રમ્પ તરફથી ફોન આવ્યો હતો અને નરેન્દ્રએ સરેન્ડર કર્યું. રાહુલે કહ્યું કે જો ભાજપ-આરએસએસના લોકો પર થોડું પણ દબાણ કરવામાં આવે તો તેઓ ડરીને ભાગી જાય છે. દેશમાં વૈચારિક લડાઈ પર ભાર મૂકતા રાહુલ ગાંધીએ ભાજપ પર ભારતના બંધારણને નબળું પાડવાનો અને સામાજિક ન્યાયની વિરુદ્ધ કામ કરવાનો આરોપ લગાવ્યો.