15 July, 2026 07:28 PM IST | Mumbai | Gujarati Mid-day Online Correspondent
સુપ્રિયા સુળે (સૌજન્ય: મિડ-ડે)
પરિસીમન બિલ અંગે ચાલી રહેલી ચર્ચા વચ્ચે NCP (SP)એ કહ્યું છે કે હાલ તેમણે આ મુદ્દે કોઈ અંતિમ નિર્ણય લીધો નથી. પાર્ટીએ જણાવ્યું કે જો બિલમાં 50 ટકા કોટાની જોગવાઈ હશે તો તે મુદ્દે વિચાર કરવામાં આવશે. સુપ્રિયા સુળેએ કહ્યું કે બિલ સંસદમાં રજૂ થયા પછી જ પાર્ટી પોતાનો સત્તાવાર અભિપ્રાય આપશે. તેમણે કહ્યું કે બિલ આવ્યા બાદ INDIA ગઠબંધનના તમામ પક્ષો સાથે મળીને ચર્ચા કરશે અને પછી નિર્ણય લેવામાં આવશે. સુપ્રિયા સુળેએ કહ્યું કે અત્યાર સુધી પરિસીમન મુદ્દે ન તો અમારી કોઈ સાથે વાત થઈ છે અને ન તો કોઈએ અમારો સંપર્ક કર્યો છે. તેમણે યાદ અપાવ્યું કે DMK, સમાજવાદી પાર્ટી અને NCP (એસપી) પહેલાથી જ 50 ટકા કોટાના મુદ્દે વિચાર કરવાની વાત કરી ચૂક્યા છે.
સુપ્રિયા સુળેએ કહ્યું કે INDIA ગઠબંધને ક્યારેય પરિસીમનની માગ કરી નથી. તેમણે સ્પષ્ટ કર્યું કે તેમની મુખ્ય માગ મહિલાઓને 33 ટકા અનામતનો કાયદો અમલમાં મૂકવાની છે. સુળેએ જણાવ્યું કે ગયા બજેટ સત્ર દરમિયાન કેન્દ્રીય મંત્રી કિરણ રિજિજૂએ તેમને, અસદુદ્દીન ઓવૈસી અને અરવિંદ સાવંતને ચર્ચા માટે બોલાવ્યા હતાં. તેમણે કહ્યું કે ત્યારબાદ મલ્લિકાર્જુન ખરગેના નેતૃત્વમાં INDIA ગઠબંધને ગૃહમંત્રી અમિત શાહને પત્ર લખ્યો હતો. પત્રમાં તમામ વિરોધ પક્ષોને એકસાથે બેઠક માટે બોલાવવાની માગ કરવામાં આવી હતી. આ નિવેદન બાદ NCP (SP) એનડીએમાં જોડાશે તેવી અટકળો પર પણ વિરામ લાગ્યો છે. છેલ્લા કેટલાક દિવસોથી પાર્ટી એનડીએમાં જઈ શકે છે તેવી ચર્ચાઓ ચાલી રહી હતી. જોકે, અત્યાર સુધી પાર્ટીના કોઈ પણ નેતાએ એનડીએમાં જોડાવાનો સત્તાવાર નિર્ણય જાહેર કર્યો નથી.
શિવસેનાએ મહિલા અનામત બિલ પર વિચાર કરવાની વાત કરી છે. પાર્ટીના રાજ્યસભા સાંસદ સંજય રાઉતે કહ્યું કે જો સરકાર ફરી એ જ બિલ લાવશે તો સમગ્ર વિરોધ પક્ષ તેનો વિરોધ કરશે. તેમણે જણાવ્યું કે બિલમાં કેટલાક ફેરફારો કરવાની સલાહ સરકારને આપવામાં આવી છે. જો સરકાર તેમના સૂચનો સ્વીકારશે, તો પાર્ટી બિલ પર આગળ ચર્ચા કરશે. મહિલાઓને અનામત અને લોકસભાની બેઠકો વધારવા સંબંધિત બંધારણીય સુધારા બિલ એપ્રિલમાં લોકસભામાં પસાર થઈ શક્યું નહોતું. બિલના સમર્થનમાં 298 મત પડ્યા હતા, જ્યારે વિરોધમાં 230 મત પડ્યા હતા. કુલ 528 સાંસદોએ મતદાન કર્યું હતું. બિલ પસાર કરવા માટે 352 મત જરૂરી હતા, પરંતુ જરૂરી બહુમતી ન મળતા બિલ રદ થયું.
સૂત્રોના જણાવ્યા મુજબ, જયંત પાટીલની બેઠકમાં NCPના 10માંથી 9 ધારાસભ્યોએ NDAમાં જોડાવાની ઇચ્છા વ્યક્ત કરી હતી. અહેવાલ મુજબ, આ બેઠકમાં પાર્ટીના ભવિષ્ય અંગે ચર્ચા કરવામાં આવી હતી. સૂત્રોનું કહેવું છે કે જયંત પાટીલ પણ પાર્ટીના અસ્તિત્વ માટે NDAમાં જોડાવું વધુ સારો વિકલ્પ માને છે. તેમણે ધારાસભ્યોને વિશ્વાસ અપાવ્યો કે તેમની માગ અને લાગણી અંગે પાર્ટી પ્રમુખ શરદ પવારને જાણ કરવામાં આવશે. જોકે, NCP તરફથી NDAમાં જોડાવા અંગે હજુ સુધી કોઈ સત્તાવાર જાહેરાત કરવામાં આવી નથી.
પાર્ટીના સત્તાવાર પ્રવક્તા મહેશ તાપસેએ NDAમાં જોડાવાની અટકળોને નિરાધાર અને માત્ર અફવા ગણાવી છે. તેમણે કહ્યું કે પાર્ટીની કાર્યકારી અધ્યક્ષ અને સાંસદ સુપ્રિયા સુળેએ પહેલાથી જ આવી કોઈપણ શક્યતાને સ્પષ્ટપણે નકારી દીધી છે.
