બાંદ્રામાં ચાર ટ્રાન્સજેન્ડરોએ મચાવ્યો હોબાળો! બિલ્ડર પાસે પાંચ લાખ રૂપિયાની માંગણી કરી

Mumbai Crime: બાંદ્રા પોલીસે એક બાંધકામના ભૂમિપૂજન સમારોહમાં ઘૂસવાના આરોપમાં ચાર ટ્રાન્સજેન્ડર વ્યક્તિઓની ધરપકડ કરી છે; તૃતીયપંથીઓના ગ્રુપે બિલ્ડર પાસે પાંચ લાખ રુપિયાની માંગણી કરી હતી; આ મામલે એફઆઇઆર રજીસ્ટર કરવામાં આવી છે

પ્રતીકાત્મક ફાઇલ તસવીર

બાંદ્રા (Bandra) પશ્ચિમથી એક ઘટના બની છે. જેમાં બાંદ્રા પોલીસ (Bandra Police)એ ચાર ટ્રાન્સજેન્ડર વ્યક્તિઓની ધરપકડ કરી છે, જેમની સામે બાંધકામ સ્થળ પર ભૂમિ પૂજન સમારોહમાં ઘૂસીને બિલ્ડર પાસે ૫.૫ લાખ રૂપિયાની ખંડણી માંગવાનો આરોપ (Mumbai Crime) છે. આ ઘટના શનિવારે સાંજે બાંદ્રા પશ્ચિમ (Bandra West)ના એક અગ્રણી વ્યાપારી અને રહેણાંક વિસ્તાર, હિલ રોડ (Hill Road) વિસ્તારમાં બની હતી.

બિલ્ડર પાસે પાંચ લાખની માંગી બક્ષીસ

બાંદ્રાના હિલ રોડ પર તૃતીયપંથી વ્યક્તિઓના જૂથે એક બિલ્ડરને "બક્ષીસ" તરીકે ૫.૫ લાખ રૂપિયા ચૂકવવામાં ન આવે તો ભૂમિ પૂજન સમરોહમાં વિક્ષેપ પાડવાની ધમકી આપી હોવાનો આરોપ છે. બાંદ્રા પોલીસ સ્ટેશને ચાર જણ વિરુદ્ધ ખંડણીનો કેસ નોંધ્યો હતો અને ચાર જણની ધરપકડ પણ કરી છે.

ચાર ટ્રાન્સજેન્ડરની ધરપકડ

આરોપીઓની ઓળખ સુગંધી પિલ્લે, નાગરાજ પિલ્લે, પ્રિયા પોન્નુસ્વામી અને વિમલા તરીકે થઈ છે, જે બધા સાયન કોલીવાડા (Sion Koliwada)ના રહેવાસી છે. પ્રાથમિક તપાસ અને પુરાવાઓની ચકાસણી બાદ, તેમની સામે ખંડણીનો કેસ નોંધવામાં આવ્યો છે. ચારેય આરોપીઓ હાલમાં પોલીસ કસ્ટડીમાં છે.

પોલીસ અધિકારીઓના જણાવ્યા અનુસાર, આ ફરિયાદ આકાશ દિનેશ પાટીલ (ઉંમર વર્ષ ૩૨) દ્વારા દાખલ કરવામાં આવી હતી, જે બાંધકામ સ્થળ પર સિક્યોરિટી મેનેજર તરીકે કામ કરે છે. ૨૧ ફેબ્રુઆરીના રોજ, બપોરે લગભગ ૧૨.૪૦ વાગ્યે, હિલ રોડ પર GVK કંપનીના બિલ્ડિંગ પ્રોજેક્ટ માટે ભૂમિ પૂજન સમારોહનું આયોજન કરવામાં આવ્યું હતું. આ સમારોહમાં કંપનીના પ્રતિનિધિઓ, સ્ટાફ સભ્યો અને આમંત્રિત મહેમાનો હાજર રહ્યા હતા.

કાર્યક્રમ દરમિયાન બે ટ્રાન્સજેન્ડર વ્યક્તિઓ પૂર્વ પરવાનગી વિના સ્થળમાં પ્રવેશ્યા હતા. ફરિયાદ મુજબ, તેઓએ ખલેલ પહોંચાડવાનું શરૂ કર્યું અને આયોજકો સાથે દુર્વ્યવહાર કર્યો. તેમણે ૫.૫ લાખ રુપિયાની માંગણી કરી હતી અને ધમકી આપી હતી કે જો બપોરે 3 વાગ્યા સુધીમાં રકમ ચૂકવવામાં નહીં આવે તો આયોજકોને ગંભીર પરિણામો ભોગવવા પડશે.

પોલીસ સૂત્રોએ જણાવ્યું હતું કે, બંનેએ કથિત રીતે અભદ્ર વર્તન કર્યું હતું અને કાર્યક્રમમાં ખલેલ પહોંચાડી હતી, જેના કારણે હાજર લોકોમાં ગભરાટ ફેલાયો હતો.

તે જ સાંજે, લગભગ ૬.૪૦ વાગ્યે, બે વધુ વ્યક્તિઓ સ્થળ પર પહોંચ્યા અને આયોજકો પર અગાઉના બંને વતી માંગવામાં આવેલી રકમ ચૂકવવા દબાણ કર્યું. બંદોબસ્ત ફરજ માટે સ્થળ પર હાજર પોલીસ કર્મચારીઓએ તાત્કાલિક હસ્તક્ષેપ કર્યો અને બંને વ્યક્તિઓની અટકાયત કરી. તેમના મોબાઇલ ફોન તપાસ્યા પછી, અધિકારીઓને તેમની અને અગાઉના શંકાસ્પદો વચ્ચે વાતચીતની લિંક મળી આવી.

ફરિયાદ અને પ્રાથમિક તપાસના આધારે, બાંદ્રા પોલીસે ભારતીય ન્યાય સંહિતા (Bharatiya Nyaya Sanhita), ૨૦૨૩ની કલમ 308(3), 351(2) અને 352, તેમજ મહારાષ્ટ્ર પોલીસ અધિનિયમ, 1951ની સંબંધિત જોગવાઈઓ હેઠળ ગુનો નોંધ્યો છે.

આ મામલે વધુ તપાસ સબ-ઇન્સ્પેક્ટર વનિતા પીસે કરી રહ્યા છે. પોલીસ અધિકારીઓએ જણાવ્યું છે કે, વધુ કોઈ અનિચ્છનીય ઘટનાઓ ન બને તે માટે સાવચેતીના પગલા તરીકે બાંધકામ સ્થળ પર વધારાની સુરક્ષા ગોઠવવામાં આવી છે. અધિકારીઓ એ પણ તપાસ કરી રહ્યા છે કે શું આરોપીઓ ભૂતકાળમાં આવી જ ઘટનાઓમાં સંડોવાયેલા હતા કે શું!