01 October, 2026 03:37 PM IST | New Delhi | Gujarati Mid-day Online Correspondent
ભારતીય વિદેશ મંત્રાલયની ચેતવણી
રશિયન સેનામાં ભારતીય નાગરિકોની ભરતી થઈ રહી હોવાના અહેવાલો વચ્ચે ભારત સરકારે ફરી એકવાર ભારતીયોને કડક ચેતવણી આપી છે. વિદેશ મંત્રાલયે રશિયન સશસ્ત્ર દળોમાં જોડાવા અંગે નવી એડવાઇઝરી જાહેર કરીને આવા પગલાને જોખમી અને જીવલેણ ગણાવ્યું છે. વિદેશ મંત્રાલય દ્વારા 30 સપ્ટેમ્બરે જાહેર કરાયેલી એડવાઇઝરીમાં જણાવાયું છે કે છેલ્લા બે વર્ષ દરમિયાન સરકાર અનેક વખત ભારતીય નાગરિકોને રશિયન સેનામાં ભરતી સાથે સંકળાયેલા ગંભીર જોખમો અંગે ચેતવણી આપી ચૂકી છે. મંત્રાલયે વિદેશમાં નોકરીની તકો શોધતી વખતે પણ ખાસ સાવચેતી રાખવાની સલાહ આપી છે. સરકારે લોકોને ખાસ કરીને વેરિફાઇડ ન હોય તેવા એજન્ટો અને બિનસરકારી સંસ્થાઓ મારફતે મળતી નોકરીની ઓફરથી સાવચેત રહેવા જણાવ્યું છે.
વિદેશ મંત્રાલયે જણાવ્યું છે કે એવા અનેક કિસ્સા સરકારના ધ્યાનમાં આવ્યા છે જેમાં કેટલાક ભારતીયો રશિયન સશસ્ત્ર દળોમાં જોડાવા માટે સ્વેચ્છાએ તકો શોધી રહ્યા છે. આવા લોકોમાં એવી ધારણા જોવા મળી છે કે રશિયન સેનામાં જોડાઈને તેમને આર્થિક લાભ મળશે અને ત્યારબાદ ભારત સરકારનો સંપર્ક કરીને તેઓ રશિયન સેનામાંથી મુક્તિ મેળવી શકશે. મંત્રાલયે સ્પષ્ટ શબ્દોમાં કહ્યું છે કે રશિયન સેનામાં જોડાવાનો આ રસ્તો અત્યંત જોખમી છે. સરકારે ભારતીય નાગરિકોને આવા પગલાંથી દૂર રહેવાની કડક સલાહ આપી છે.
વિદેશ મંત્રાલયે વધુમાં જણાવ્યું છે કે કેટલાક કિસ્સાઓમાં ભારતીય નાગરિકોએ સ્વેચ્છાએ પોતાની ભારતીય નાગરિકતા છોડીને રશિયન પાસપોર્ટ મેળવ્યો અને ત્યારબાદ રશિયન સેનામાં ભરતી થવા માટે ભારતીય અધિકારીઓનો સંપર્ક કર્યો હતો. કેટલાક લોકોએ ટૂંકા ગાળાના આર્થિક લાભની આશામાં ભારતીય અધિકારીઓની સલાહ લીધા વિના આવા નિર્ણયો લીધા હોવાનું પણ મંત્રાલયે જણાવ્યું છે. સરકારનું કહેવું છે કે આવા પગલાંના ગંભીર પરિણામો આવી શકે છે અને તેમાં વ્યક્તિના જીવન માટે પણ મોટું જોખમ ઊભું થઈ શકે છે. મંત્રાલયે લોકોને આવા નિર્ણય લેતા પહેલાં તેની ગંભીરતા સમજવા અને તેઓ પોતાને કેવા જોખમમાં મૂકી રહ્યા છે તે અંગે વિચાર કરવા અપીલ કરી છે.
ભારત સરકારે સ્પષ્ટ કર્યું છે કે રશિયન સશસ્ત્ર દળોમાં હાલમાં સેવા આપી રહેલા તમામ ભારતીય નાગરિકોની સુરક્ષા અને સુખાકારી સુનિશ્ચિત કરવા માટે રશિયન પક્ષ સાથે સતત સંપર્ક કરવામાં આવી રહ્યો છે. આ ઉપરાંત, આવા ભારતીય નાગરિકોને શક્ય તેટલી વહેલી તકે ભારત પરત લાવવા માટે પણ સરકાર રશિયન સત્તાવાળાઓ સાથે સંપર્કમાં છે. સરકારે ફરી એકવાર ભારતીય નાગરિકોને રશિયન સશસ્ત્ર દળોમાં જોડાવાની કોઈપણ ઓફરથી દૂર રહેવા અને વિદેશમાં રોજગારની તકો શોધતી વખતે માત્ર વિશ્વસનીય અને વેરિફાઇડ માધ્યમોનો ઉપયોગ કરવાની સલાહ આપી છે.
