20 July, 2021 03:34 PM IST | Ahmedabad | Shailesh Nayak
સણિયા હેમાદ ગામમાં લકઝરી બસને દોરડું બાંધીને ટ્રેકટરની મદદથી પાણીની બહાર કાઢવામાં આવી હતી.
ઉપરવાસમાંથી પાણી આવતાં તેમ જ વરસાદના કારણે સણિયા હેમાદ ગામ પાસેથી પસાર થતી ખાડીમાં પાણી આવ્યું હતું. આ દરમ્યાન મુસાફરો ભરેલી એક લકઝરી બસ આ પાણીમાં બંધ થઈ જતાં મુસાફરોના જીવ અધ્ધર થઈ ગયા હતા.
દક્ષિણ ગુજરાતમાં સતત બીજા દિવસે પણ અષાઢી માહોલ સાથે વરસાદ વરસ્યો હતો. કપરાડામાં બે કલાકમાં સવાબે ઇંચ વરસાદ પડ્યો હતો. એટલું જ નહીં, ઉપરવાસમાં પડેલા ભારે વરસાદના પગલે દક્ષિણ ગુજરાતની દમણગંગા, ઔરંગા તેમ જ કોલકી નદીમાં પાણીનો ધસમસતો પ્રવાહ વહેતાં નદીઓ બે કાંઠે વહેતી થઈ હતી. ગઈ કાલે દક્ષિણ ગુજરાત તેમ જ ઉપરવાસમાં પડેલા વરસાદના કારણે નવસારી જિલ્લાના વઘઈ પાસે આવેલો લો લેવલનો ગરગાડિયા પુલ પાણીમાં ગરકાવ થઈ ગયો હતો. આશરે ૧૦ ગામોનો સંપર્ક કપાયો હતો. ગઈ કાલે સાંજે ૬ વાગ્યા સુધીમાં ગુજરાતના ૮૪ તાલુકાઓમાં વરસાદ પડ્યો હતો, જેમાં વલસાડ જિલ્લાના કપરાડામાં સાડાચાર ઇંચથી વધુ વરસાદ પડ્યો હતો.