18 February, 2025 09:01 AM IST | Rajkot | Gujarati Mid-day Correspondent
પ્રતીકાત્મક તસવીર
પૈસા કમાવા લજ્જા-શરમને નેવે મૂકીને નિર્લજ્જતાની હદ વટાવતાં વિકૃતિ ધરાવતાં તત્ત્વોએ હૉસ્પિટલમાં ચેકઅપ કરાવવા જતી મહિલા દરદીઓની ૭ વિડિયો-ક્લિપ યુટ્યુબ પર અપલોડ કરતાં હોબાળો મચી ગયો હતો. એટલું જ નહીં, અપલોડ થયેલા વિડિયો પૈકીનો એક વિડિયો રાજકોટની પાયલ મૅટરનિટી હૉસ્પિટલનો હોવાની વિગતો બહાર આવતાં ગઈ કાલે રાજકોટ સાઇબર ક્રાઇમે હૉસ્પિટલમાં તપાસ હાથ ધરી હતી.
યુટ્યુબ પર મહિલા દરદીઓના ચેકઅપના વિડિયો વાઇરલ કરીને એના જેવા બીજા વિડિયો જોવા માટે ૯૦૦થી ૧૪૯૯ રૂપિયામાં સબસ્ક્રાઇબ કરો એવી જાહેરાતથી હોબાળો મચ્યો હતો. મહિલાઓને ઇન્જેક્શન આપતા, થેરપીના, બ્રેસ્ટ એક્ઝામિનેશનના, એક્સરે સહિતના ચેકઅપના વિડિયો હોવાનું જણાવીને અત્યંત નિમ્ન કક્ષાની માનસિકતા ધરાવતા નિર્લજ્જ લોકોએ વિડિયોના વેપલાનું સુવ્યવસ્થિત આયોજન હાથ ધર્યું હતું. આ પ્રકારના વિડિયો વાઇરલ થયા હોવાની વિગતો બહાર આવતાં અમદાવાદ સાઇબર ક્રાઇમે તપાસ હાથ ધરી હતી. સાઇબર ક્રાઇમના અધિકારીએ મીડિયાને કહ્યું હતું કે ‘સાઇબર ક્રાઇમ અમદાવાદના ધ્યાનમાં એક યુટ્યુબ ચૅનલ આવી હતી જેમાં અલગ-અલગ સમયે એક હૉસ્પિટલમાં મહિલાઓ સારવાર માટે જાય છે અને ઇન્જેક્શન આપતા હોય એવા વિડિયો અપલોડ કરવામાં આવ્યા છે અને ડિસ્ક્રિપ્શનમાં ટેલિગ્રામની લિન્ક આપવામાં આવી છે જેથી સાઇબર ક્રાઇમે યુટ્યુબ ચૅનલ અને ટેલિગ્રામ ચૅનલના ક્રીએટર વિરુદ્ધમાં તપાસ ચાલુ કરી છે.’
બપોર બાદ ગુજરાતમાં આ મુદ્દે હોબાળો મચી ગયો હતો. ખાસ કરીને વિડિયોમાં મહિલા દરદી અને હૉસ્પિટલના સ્ટાફ વચ્ચે સંવાદ સંભળાતો હતો એ ગુજરાતીમાં હતો અને એની લઢણ સૌરાષ્ટ્રની બોલી જેવી હતી. દરમ્યાન જે વિડિયો અપલોડ થયા હતા એ પૈકીના એક વિડિયોનાં ફુટેજ રાજકોટમાં આવેલી પાયલ મૅટરનિટી હૉસ્પિટલનાં હોવાની વિગતો બહાર આવી હતી જેથી રાજકોટ સાઇબર ક્રાઇમે હૉસ્પિટલમાં તપાસ હાથ ધરી હતી.
રાજકોટની પાયલ મૅટરનિટી હૉસ્પિટલ સામે વિરોધ વધતાં હૉસ્પિટલનાં સત્તાવાળાઓએ મીડિયાને કહ્યું હતું કે ‘એવું લાગે છે કે ફુટેજ અમારી હૉસ્પિટલના છે. કૅમેરા કોઈકે હૅક કર્યા હોય એવું બની શકે. આ માટે અમે પોલીસમાં ફરિયાદ કરીશું.’