04 March, 2021 10:00 AM IST | Ahmedabad | Shailesh Nayak
પ્રતીકાત્મક તસવીર
ગુજરાતની સંસ્કારનગરી વડોદરામાં સમા વિસ્તારમાં રહેતા સોની પરિવારે ગઈ કાલે ઠંડાં પીણાંમાં ઝેરી દવા ભેળવીને સામૂહિક આપઘાતનો પ્રયાસ કર્યો હતો. આ માસ સુસાઇડ અટૅમ્પની કાળજુ કંપાવી દે તેવી ઘટનામાં સોની પરિવારના એક બાળક સહિત ત્રણ સભ્યોનાં મૃત્યુ થયાં છે જ્યારે ત્રણ સભ્યોને સારવાર માટે હૉસ્પિટલમાં ખસેડાયા છે.
વડોદરાના સમા વિસ્તારમાં આવેલી સ્વાતી સોસાયટીમાં ભાડે રહેતા નરેન્દ્ર સોનીના પરિવારના છ સભ્યો ગઈ કાલે બપોરે તેમના ઘરમાં કોઈ અગમ્ય કારણોસર ઠંડાં પીણાંની અંદર ઝેરી દવા ભેળવીને પી ગયા હતા. આપઘાત કર્યા બાદ ઘરના એક સભ્યે ૧૦૮ને ફોન કર્યો હોવાની વિગતો બહાર આવી છે. જેના કારણે ૧૦૮ની એમ્બ્યુલન્સ ઘટના સ્થળે પહોંચી હતી પરંતુ આ દરમ્યાન ઘરના ત્રણ સભ્યોનાં મૃત્યુ થયાં હતાં. વડોદરા પોલીસે મીડિયાને આ ઘટના અંગે કહ્યું હતું કે આજુબાજુ પાડોશીઓના કહેવા મુજબ ઘરના મોભી છેલ્લા એક દોઢ વર્ષથી ફાઇનૅશ્યલી એક્ટિવ નહોતા, એટલે આર્થિક ભીંસ એક મોટું કારણ હોવાનું અત્યારે હાલપૂરતું લાગી રહ્યું છે.