20 August, 2026 10:50 AM IST | Surat | Gujarati Mid-day Correspondent
પ્રતીકાત્મક ફાઇલ તસવીર
બાંદરા ટર્મિનસથી દિલ્હી જઈ રહેલી ગોલ્ડન ટેમ્પલ એક્સપ્રેસમાં ૧૭ ઑગસ્ટે જનરલ કોચમાં પ્રવાસીઓ સાથે ઝઘડો કર્યા બાદ તેમના પર ફાયર-એક્સ્ટિંગ્વિશરથી હુમલો કરનારા ૪૫ વર્ષના એક વિદેશી નાગરિકનું શંકાસ્પદ સંજોગોમાં સુરત રેલવે-સ્ટેશન પર મૃત્યુ થયું હતું. આ વિદેશી નાગરિક પાસે પાસપોર્ટ કે વીઝા પણ નહોતા અને તેની ઓળખ પુરવાર કરે એવા કોઈ દસ્તાવેજો પણ નહોતા. સુરત રેલવે-પોલીસે ઍક્સિડેન્ટલ ડેથનો ગુનો નોંધીને તપાસ શરૂ કરી છે.
આ વિદેશી નાગરિકે જનરલ કોચમાં દરવાજા પાસે બેસવાના મુદ્દે સહપ્રવાસીઓ સાથે ઝઘડો કર્યો હતો અને તેથી પ્રવાસીઓએ રેલવે-પોલીસને જાણ કરી હતી. તેણે સહપ્રવાસીઓ પર કરેલા હુમલા બાદ જ્યારે ટ્રેન સુરત પહોંચી ત્યારે રેલવે-પોલીસ ડબ્બામાં આવી હતી અને તેને નીચે ઉતાર્યો હતો, પણ તેને કસ્ટડીમાં લેતાં પહેલાં જ તે ઢળી પડ્યો હતો અને હૉસ્પિટલમાં લઈ જતાં ડૉક્ટરોએ તેને મૃત ઘોષિત કર્યો હતો.
