13 February, 2021 03:30 PM IST | Ahmedabad | Gujarati Mid day Correspondent
પ્રતીકાત્મક તસવીર
ગુજરાતમાં સેલ્ફ ફાઇનૅન્સ સ્કૂલોમાં અને એમાં પણ અંગ્રેજી માધ્યમમાં અભ્યાસ કરવા માટે ઊંચી ફી વસૂલવામાં આવી રહી છે ત્યારે ઊંચી ફીથી પીડાતા વાલીઓની નાડ પારખી લઈને ગુજરાત કૉન્ગ્રેસે અમદાવાદ સહિત ૬ મહાનગરપાલિકામાં કૉન્ગ્રેસ પક્ષ સત્તામાં આવશે તો અંગ્રેજી માધ્યમમાં ફ્રી શિક્ષણ આપવાના ગઈ કાલે શપથ લીધા હતા.
ગુજરાત પ્રદેશ કૉન્ગ્રેસ સમિતિના પ્રમુખ અમિત ચાવડાએ ગઈ કાલે પ્રેસ-કૉન્ફરન્સમાં ચુંટણી માટેનો શપથપત્ર જાહેર કરતાં કહ્યું કે ‘અમારે વાયદા નથી કરવા એટલે શપથપત્ર લઈને આવ્યા છીએ. અમારે રાઇટ કરવું છે અટલે ગુજરાઇટ લઈને આવ્યા છીએ. ચૂંટણી અગાઉ અમે હેલો કૅમ્પેન કર્યું હતું જેમાં નાગરિકો જોડાયા હતા. તેમની રજૂઆતો સાંભળીને અમે શપથપત્ર બનાવ્યો છે. આ શપથપત્ર એ વચન નહીં, પણ શપથ છે.’