બાહુબલી પાંઉભાજી

ચર્ની રોડમાં આવેલી પાંઉભાજી માટે જાણીતી ગોવિંદાશ્રમ રેસ્ટોરાંએ એક બાહુબલી પાંઉભાજી કૉમ્બો શરૂ કર્યું છે.

બાહુબલી પાંઉભાજી

છાશવારે પબ્લિસિટી સ્ટન્ટ માટે રેસ્ટોરાંઓ જાયન્ટ ડિશ તૈયાર કરીને એને ફિનિશ કરવાની ચૅલેન્જ આપતા હોય છે. જોકે એમાં ફૂડનો બગાડ પુષ્કળ થાય છે. અલબત્ત, હવે રેસ્ટોરાંવાળા ભોજનનો બગાડ ન થાય એ માટે એકલા ડિશ ફિનિશ કરવા કરતાં મિત્રો સાથે બેસીને એને એન્જૉય કરી શકાય એવી ડીલ આપતા થઈ ગયા છે. ચર્ની રોડમાં આવેલી પાંઉભાજી માટે જાણીતી ગોવિંદાશ્રમ રેસ્ટોરાંએ એક બાહુબલી પાંઉભાજી કૉમ્બો શરૂ કર્યું છે. એમાં ત્રણ નૉર્મલ સર્વિંગ્સ જેટલી ભાજી હોય છે અને સાથે બટરથી લથબથ ૧૬ પાંઉ હોય છે. એ ઉપરાંત ૮ ગુલાબજાંબુ, ચાર કોલ્ડ ડ્રિન્ક્સ અને આઠ પાપડ તેમ જ કાંદા-ટમેટાં-કોબીનું મોટું કચુંબર ભરેલું બાઉલ હોય છે. પાંઉભાજીના પ્રણેતા કહેવાતા સરદાર પાંઉભાજીવાળાએ આ ડિશને એટલી બટરલી બનાવી દીધી છે કે ત્રણ સર્વિંગ્સ એકસામટા કોઈ એક વ્યક્તિ પૂરી કરી શકે એવું તો હજી સુધી સંભવ નથી બન્યું, પરંતુ આ કૉમ્બો ભુખ્ખડ મિત્રો સાથે ખાવા જાઓ તો ઇકૉનૉમિક જરૂર પડી શકે છે. આ બાહુબલી પાંઉભાજી ૭૯૯ રૂપિયામાં મળે છે અને એની ક્વૉન્ટિટી જોતાં ચારથી પાંચ મિત્રો આરામથી એમાં પેટ ભરીને ભોજન કરી શકે એમ છે.