25 January, 2022 01:20 PM IST | Mumbai | Gujarati Mid-day Correspondent
કપિલ શર્મા
કપિલ શર્માએ જણાવ્યું છે કે એવી કઈ વસ્તુ છે જે તેને કૉમેડી કરતાં પણ વધુ પસંદ છે. તેનું કહેવું છે કે તેને તેની વાઇફ ગિની ચતરથ વધુ પસંદ છે. આ બન્નેએ ૨૦૧૮માં લગ્ન કર્યાં હતાં. તેમને એક દીકરી અને એક દીકરો છે. કપિલની લાઇફનાં વિવિધ પાસાંઓ દેખાડતો શો ‘કપિલ શર્માઃ આઇ ઍમ નૉટ ડન યટ’ વિડિયો સ્ટ્રીમિંગ સર્વિસ નેટફ્લિક્સ પર ૨૮ જાન્યુઆરીએ આવવાનો છે. ગિની સાથેના પોતાના શરૂઆતના દિવસો વિશે કપિલે કહ્યું કે ‘ગિની જલંધરની ગર્લ્સ કૉલેજમાં હતી અને તે મારાથી ૩-૪ વર્ષ નાની હતી. હું PG ડિપ્લોમા કમર્શિયલ આર્ટ્સમાં ભણી રહ્યો હતો. એ વખતે મને પૈસાની ખૂબ જરૂર હતી. હું હંમેશાં થિયેટર્સમાં ભાગ લેતો હતો અને અન્ય કૉલેજમાં જતો હતો. ગિની સ્ટુડન્ટ હતી અને તે ખૂબ કુશળ હતી. તે અભિનય અને સ્કિટ્સમાં માહેર હતી. મેં તેને મારી અસિસ્ટન્ટ બનાવી દીધી હતી. તે સારા પરિવારમાંથી આવતી હતી. મને આજે પણ યાદ છે કે તે દરરોજ આલિશાન કારમાં કૉલેજમાં આવતી હતી અને હું મારું સ્કૂટર ચલાવતો હતો.’
ગિની સાથે રિલેશન જામશે એની તેને કલ્પના નહોતી. એ વિશે કપિલે કહ્યું કે ‘તેણે જ પ્રેમનો એકરાર પહેલાં કર્યો હતો. જોકે અમારા બન્ને વચ્ચે આર્થિક અંતર હોવાથી મને હંમેશાં શંકા જતી હતી કે કંઈ પણ થઈ શકે છે. મારા એક ફ્રેન્ડે પણ મને જણાવ્યું હતું કે ગિનીને હું ગમું છું, પરંતુ એ વાતને મેં વધુ સિરિયસલી લીધી નહીં. મેં કદી પણ વિચાર્યું નહોતું કે અમારી વચ્ચે કંઈ સંબંધો જામી શકશે. જોકે ભગવાન ખૂબ દયાળુ છે અને હું લકી છું કે મારાં લગ્ન તેની સાથે થયાં છે. હું જ્યારે જીવનમાં ઉતાર-ચડાવમાંથી પસાર થઈ રહ્યો હતો ત્યારે મેં જીવનમાં યોગ્ય નિર્ણયો લેવાનું નક્કી કર્યું હતું. એમાં પણ સૌથી પહેલો ફેંસલો તેની સાથે લગ્ન કરવાનો હતો. આજે હું નસીબદાર છું કે મારી પાસે બે બાળકો છે.’