૭ વર્ષ બાદ ટેલિવિઝન પર વાપસી કરી રહ્યો છે રાકેશ બાપટ

હવે તે રાજન શાહીની નવી સિરિયલમાં શાહીર શેખ સાથે દેખાવાનો છે

રાકેશ બાપટ

રાકેશ બાપટ હવે સાત વર્ષ બાદ ફરી એક વખત સિરિયલમાં કામ કરવાનો છે. તેણે છેલ્લે ‘કુબૂલ હૈ’માં કામ કર્યું હતું. હવે તે રાજન શાહીની નવી સિરિયલમાં શાહીર શેખ સાથે દેખાવાનો છે. શોમાં તે શાહીરના મોટા ભાઈનો રોલ કરવાનો છે. આ સિરિયલ વિશે રાકેશ બાપટે કહ્યું કે ‘૨૦૧૪માં મેં ‘કુબૂલ હૈ’માં કામ કર્યું હતું. જે લોકો સાથે હું કામ કરું તેમના વાઇબ મારા માટે અગત્યના છે. ટીમ પણ સારી હોવી જોઈએ. ટીવીથી થોડો સમય દૂર રહેવાનું કારણ એ હતું કે ક્યાંક ને ક્યાંક લોકો સાથે મારી એનર્જી ભળતી નહોતી. જોકે રાજન સર સાથે તાલમેલ બેસે છે. અમે અગાઉ ‘સાત ફેરે’માં કામ કર્યું હતું. એ મારો પહેલો શો હતો. મને તેમની ક્રીએટિવિટી ગમે છે. તેમણે જ્યારે મને રોલ ઑફર કર્યો તો મેં તરત જ હા પાડી દીધી હતી. હું ટીવી પર પાછો ફરવા માટે એક્સાઇટેડ છું. ટીવી એક પ્રકારે સતત કામ આપે છે. ફિલ્મ જેવું નથી કે એમાં તમને ગૅપ મળે છે અને તૈયારી કરવી પડે છે. એથી અહીં પ્રેશરની સાથે કામ કરવાનું હોય છે અને મને એ ગમે છે. હું સેટ પર જવા માટે અને એ દિવસોની યાદને તાજી કરવા માટે ઉત્સાહિત છું. ટીવીએ મને એક ઍક્ટર તરીકે તૈયાર કર્યો છે અને હું આ માધ્યમનો આભારી છું.’