07 May, 2021 01:27 PM IST | Mumbai | Gujarati Mid-day Correspondent
ઑસ્કર વિનર ફિલ્મમેકર આસિફ કાપડિયાની હિન્દી સિરીઝ ‘ધ લાસ્ટ અવર’માં શું છે?
ઍમેઝૉન પ્રાઇમ પર ૧૪ મેએ સુપરનૅચરલ થ્રિલર જોનરની વેબ-સિરીઝ ‘ધ લાસ્ટ અવર’ રિલીઝ થવાની છે જેમાં સંજય કપૂર અને રાઇમા સેન લીડ રોલમાં છે. બ્રિટિશ ફિલ્મમેકર આસિફ કાપડિયા આ સિરીઝના ક્રીએટિવ પ્રોડ્યુસર છે. ‘માઇન્ડ હન્ટર’, ‘સેન્ના’, ‘એમી’ ફેમ આસિફ કાપડિયાની ફિલ્મો ઑસ્કર અને બ્રિટિશ ઍકૅડેમી સહિતના અવૉર્ડ જીતી ચૂકી છે. શોની વાર્તા હિમાચલ પ્રદેશના એક શહેરમાં આકાર લે છે જ્યાં તંત્રવિદ્યા જાણનાર વ્યક્તિ રહસ્યમયી ખૂનીને પકડવા માટે પોલીસ સાથે હાથ મિલાવે છે. વ્યક્તિના મૃત્યુ પહેલાંના એક કલાકમાં શું બન્યું એની વાત આ સિરીઝમાં છે.
‘ધ લાસ્ટ અવર’માં સંજય કપૂર, રાઇમા સેન ઉપરાંત શહાના ગોસ્વામી, કર્મા તકપા, શેલી ક્રિશેન, રૉબિન તમંગ, મંદાકિની ગોસ્વામી વગેરે કલાકારો મહત્ત્વના રોલમાં છે, તો ‘મૉન્સૂન શૂટઆઉટ’ ફેમ ડિરેક્ટર અમિત કુમાર ‘ધ લાસ્ટ અવર’ના ડિરેક્ટર છે.
તેઓ આ સિરીઝના લેખક અને પ્રોડ્યુસર પણ છે. ‘ધ લાસ્ટ અવર’નું શૂટિંગ ૨૦૧૯માં જ પૂરું થઈ ચૂક્યું હતું અને ૨૦૨૦માં એ રિલીઝ થવાની હતી, પણ કોરોનાને લીધે એની રિલીઝ અટકી ગઈ હતી.