24 November, 2021 02:50 PM IST | Mumbai | Gujarati Mid-day Correspondent
જોઈ લો મેટ્રિક્સની પ્રિયંકાને
પ્રિયંકા ચોપડા જોનસ અને તેના પતિ નિક જોનસ વચ્ચે મતભેદ ચાલી રહ્યા છે અને તેઓ ડિવૉર્સ લઈ રહ્યાં હોવાની ચર્ચા ચાલી રહી છે. પ્રિયંકાએ હાલમાં ઇન્સ્ટાગ્રામ પરથી તેના નામની પાછળથી ચોપડા અને જોનસ સરનેમ કાઢી નાખી છે. આ સરનેમ કાઢી નાખવાથી તેમના લગ્નજીવનમાં પ્રૉબ્લેમ ચાલી રહ્યા હોવાની ચર્ચા છે. જોકે પ્રિયંકાએ વર્ષોથી તેના ટ્વિટર-હૅન્ડલ પર પ્રિયંકા નામ જ રાખ્યું છે. પ્રિયંકાના પતિ નિકે હાલમાં ઇન્સ્ટાગ્રામ પર કસરત કરતો એક વિડિયો શૅર કર્યો છે. આ વિડિયોમાં તે બાયશેપની કસરત કરી રહ્યો છે. આ વિડિયો પર હાલમાં પ્રિયંકાએ કમેન્ટ કરી છે, ‘Damn! I just died in your arms.’ પ્રિયંકાની આ કમેન્ટને લઈને તેના ડિવૉર્સની વાત પર પૂર્ણવિરામ લાગી ગયું છે.
પ્રિયંકા ચોપડા જોનસનું ‘ધ મેટ્રિક્સ રીસરેક્શન્સ’નું પોસ્ટર હાલમાં રિલીઝ કરવામાં આવ્યું છે. આ ફિલ્મનું મેઇન પોસ્ટર રિલીઝ કરવામાં આવ્યું હતું એમાં પ્રિયંકા નહોતી એથી દર્શકો દ્વારા એ વિશે સવાલ ઉઠાવવામાં આવ્યા હતા. જોકે મેકર્સ દ્વારા હાલમાં જ પ્રિયંકાના પાત્રનું લુક પોસ્ટર શૅર કરવામાં આવ્યું છે. આ ફોટો શૅર કરીને પ્રિયંકાએ કૅપ્શન આપી હતી, ‘...અને તે અહીં આવી ગઈ છે. તેની પણ ‘મેટ્રિક્સ’માં એન્ટ્રી થઈ રહી છે. ૨૨.૧૨.૨૧.’