રિલીઝની પહેલાં જ રામાયણ ફિલ્મે તોડી નાખ્યો ધુરંધર 2નો એક રેકૉર્ડ

રિલીઝની પહેલાં જ રામાયણ ફિલ્મે તોડી નાખ્યો ધુરંધર 2નો એક રેકૉર્ડ

રણબીર કપૂરની ‘રામાયણ’ આ વર્ષની સૌથી વધુ રાહ જોવાતી ફિલ્મોમાંની એક છે. અંદાજે ૪૦૦૦ કરોડ રૂપિયાના બજેટમાં બે ભાગમાં બની રહેલી આ ફિલ્મમાં રણબીર, સની દેઓલ અને યશ જેવા સુપરસ્ટાર્સ જોવા મળશે. માનવામાં આવી રહ્યું છે કે રિલીઝ બાદ આ ફિલ્મ બૉક્સ-ઑફિસ પર કમાણીના નવા ઇતિહાસ રચી શકે છે. જોકે રિલીઝ પહેલાં જ ફિલ્મે એક મોટો રેકૉર્ડ પોતાના નામે કરી લીધો છે.
‘રામાયણ’ ફિલ્મે માત્ર નવો રેકૉર્ડ નથી બનાવ્યો, બ્લૉકબસ્ટર ફિલ્મ ‘ધુરંધર 2’નો એક મહત્ત્વનો રેકૉર્ડ પણ તોડી નાખ્યો છે. રિપોર્ટ પ્રમાણે ટી-સિરીઝે ‘રામાયણ’ના તમામ ભાષાઓના 
મ્યુઝિક-રાઇટ્સ ૭૫ કરોડમાં રૂપિયામાં ખરીદી લીધા છે. આ સાથે જ હિન્દી સિનેમાના ઇતિહાસમાં કોઈ પણ ફિલ્મના મ્યુઝિક-રાઇટ્સ માટે થયેલી આ સૌથી મોટી ડીલ બની ગઈ છે. 
અત્યાર સુધી સૌથી મોટી મ્યુઝિક-રાઇટ્સ ડીલનો રેકૉર્ડ ‘ધુરંધર 2’ના નામે હતો કારણ કે એના મ્યુઝિક-રાઇટ્સ ૫૪ કરોડ રૂપિયામાં વેચાયા હતા. હવે ‘રામાયણ’ ફિલ્મે આ રેકૉર્ડ તોડીને હિન્દી સિનેમાની સૌથી મોટી મ્યુઝિક-ડીલનો ખિતાબ પોતાના નામે કરી લીધો છે.