11 May, 2026 02:40 PM IST | Mumbai | Gujarati Mid-day Correspondent
રાગિની MMS 3માં જુનૈદ ખાન સાથે જામશે તમન્ના ભાટિયા અને નર્ગિસ ફખરીની જોડી
એકતા કપૂરની લોકપ્રિય હૉરર-થ્રિલર ફ્રૅન્ચાઇઝી ‘રાગિની MMS’ ફરી એક વખત ફિલ્મી પડદે આવવા તૈયાર છે. આ સિરીઝની ત્રીજી ફિલ્મ ‘રાગિની MMS 3’માં જુનૈદ ખાન સાથે તમન્ના ભાટિયા અને નર્ગિસ ફખરી જોવા મળશે. લેટેસ્ટ રિપોર્ટ પ્રમાણે આ ફિલ્મમાં હવે સલમાન ખાનના બનેવી આયુષ શર્માની પણ એન્ટ્રી થઈ છે. આયુષ શર્મા આ સુપરનૅચરલ થ્રિલરમાં તમન્ના ભાટિયા સાથે સ્ક્રીન શૅર કરતો જોવા મળશે. તમન્નાનું પાત્ર ફિલ્મમાં આયુષ અને જુનૈદ બન્ને સાથે રોમૅન્સ કરતું જોવા મળશે. ફિલ્મમાં નર્ગિસ ફખરી આ વખતે એક અલગ અવતારમાં જોવા મળશે. તે આ ફિલ્મમાં પોલીસ-અધિકારી તરીકે જોવા મળશે.
રિપોર્ટ પ્રમાણે ‘રાગિની MMS’ને એવી હૉરર ફિલ્મ તરીકે પ્રમોટ કરવામાં આવી રહી છે જેમાં સસ્પેન્સ, કૉમેડી અને ડરનું સંતુલિત મિશ્રણ હશે. આ વખતે નિર્માતાઓનું ધ્યાન એક મજબૂત સુપરનૅચરલ વાર્તા પર છે, જે દર્શકોને અંત સુધી સીટ સાથે જોડી રાખશે. હાલમાં આ ફિલ્મ પ્રી-પ્રોડક્શનના તબક્કામાં છે અને એનું શૂટિંગ જુલાઈમાં શરૂ થવાની ધારણા છે.
