18 September, 2021 01:15 PM IST | mumbai | Gujarati Mid-day Correspondent
‘PM નરેન્દ્ર મોદી’ને ડિજિટલ પ્લૅટફૉર્મ પર કરવામાં આવશે રિલીઝ
વિવેક ઑબેરૉય અભિનીત ‘PM નરેન્દ્ર મોદી’ને MX પ્લેયર પર ૨૩ સપ્ટેમ્બરે રિલીઝ કરવામાં આવશે. આ ફિલ્મમાં મનોજ જોશી, બરખા બિશ્ત, ઝરીના વહાબ અને બમન ઈરાની લીડ રોલમાં છે. આ ફિલ્મ દ્વારા દેશના વડા પ્રધાન નરેન્દ્ર મોદીના જીવન સાથે સંકળાયેલી રજેરજ માહિતી લોકો સુધી પહોંચાડવામાં આવશે. ફિલ્મમાં પીએમ મોદીની ભૂમિકાને વિવેક ઑબેરૉયે સાકાર કરી છે. આ ફિલ્મ વિશે વિવેક ઑબેરૉયે કહ્યું હતું કે ‘મને વડા પ્રધાન પ્રતિ અપાર સન્માન છે. તેમની સ્ટોરીને વિશ્વ સુધી સિનેમાના માધ્યમથી લઈ જવાની તક મને મળી એ મારા માટે સન્માન સમાન છે. મોદીજીની જર્નીમાં ગુજરાતના મુખ્ય પ્રધાન બનવાથી લઈને ભારતના વડા પ્રધાન બનવા સુધીના ઇતિહાસને દેખાડવામાં આવ્યો છે. મને એ વાતની અતિશય ખુશી છે કે તેમની પ્રેરિત સ્ટોરીને હવે વધુ લોકો સુધી પહોંચાડવામાં આવશે.’
આ ફિલ્મને ઓમંગ કુમારે ડિરેક્ટ કરી છે. ફિલ્મની ડિજિટલ રિલીઝ વિશે ઓમંગ કુમારે કહ્યું હતું કે ‘આ પહેલી એવી ફિલ્મ છે જેના માધ્યમથી વડા પ્રધાનના જીવનને સેલિબ્રેટ કરવામાં આવ્યું છે. મને એ વાતની ખુશી છે કે MX પ્લેયર તેમની સ્ટોરીને દેખાડવા માટે એક મંચ આપી રહ્યા છે. સાથે જ આપણા દેશનાં અનેક ઘરો સુધી તેમની ગાથા પહોંચશે.’