કાર્તિક આર્યને સિદ્ધિવિનાયક મંદિરમાં દર્શન કરીને જન્મદિવસની શરૂઆત કરી

કાર્તિક મંદિરમાં આવ્યો એ સમયે મંદિરની બહાર તેના ફૅન્સ ભેગા થઈ ગયા હતા

કાર્તિક આર્યન

ગઈ કાલે કાર્તિક આર્યનની પાંત્રીસમી વર્ષગાંઠ હતી. કાર્તિકે પોતાના જન્મદિવસે સવારે સિદ્ધિવિનાયક મંદિરમાં દર્શન કરીને બાપ્પાના આશીર્વાદ લીધા હતા. કાર્તિક મંદિરમાં આવ્યો એ સમયે મંદિરની બહાર તેના ફૅન્સ ભેગા થઈ ગયા હતા. કાર્તિકે આ ફૅન્સ સાથે પ્રેમથી તસવીરો ક્લિક કરાવી હતી અને ફૂલોનો ગુલદસ્તો સ્વીકાર્યો હતો. આ સમયે મંદિરની બહાર તેની તસવીર ક્લિક કરવા ફોટોગ્રાફર્સ આવી પહોંચ્યા હતા અને તેમણે કાર્તિકને બર્થ-ડે વિશ કરી હતી તો કાર્તિકે પણ આ પ્રેમ બદલ ફૅન્સ અને ફોટોગ્રાફર્સનો આભાર માન્યો હતો.

બર્થ-ડેના દિવસે કાર્તિક આર્યન માટે ડબલ સેલિબ્રેશન- તૂ મેરી મૈં તેરા, મૈં તેરા તૂ મેરીના ટીઝર-લૉન્ચિંગમાં મીડિયા અને અનન્યા પાંડે સાથે જન્મદિવસની ઉજવણી કરી

કાર્તિક માટે ગઈ કાલનો દિવસ બર્થ-ડે હોવાના કારણે તો ખાસ હતો જ, પણ સાથે-સાથે આ દિવસે તેની અને અનન્યા પાંડેની ૨૫ ડિસેમ્બરે રિલીઝ થનારી ફિલ્મ ‘તૂ મેરી મૈં તેરા, મૈં તેરા તૂ મેરી’નું ટીઝર પણ લૉન્ચ કરવામાં આવ્યું હોવાના કારણે કાર્તિક માટે આ દિવસ ડબલ સેલિબ્રેશન જેવો બની ગયો હતો. કાર્તિકે આ ટીઝર-લૉન્ચિંગની ગ્રૅન્ડ પાર્ટીમાં ફોટોગ્રાફર્સ અને ફિલ્મની લીડ ઍક્ટ્રેસ અનન્યા પાંડે સાથે બર્થ-ડે કેક કટ કરીને જન્મદિવસની ઉજવણી કરી હતી.

બર્થ-ડે બૉય કાર્તિક આર્યનની ભોજપુરી સૉન્ગ પર ડાન્સ-મસ્તી

કાર્તિક આર્યનની ગઈ કાલે પાંત્રીસમી વર્ષગાંઠ હતી. કાર્તિકે સોશ્યલ મીડિયામાં ખુલાસો કર્યો છે કે તે પોતાના જન્મદિવસે પણ પોતાની આગામી ફિલ્મ ‘નાગઝિલા’ના શૂટિંગમાં વ્યસ્ત હતો. હવે આ ફિલ્મના સેટ પરનો એક વિડિયો ચર્ચામાં આવ્યો છે. આ વિડિયોમાં કાર્તિક સેટ પર કરવામાં આવેલા પોતાના જન્મદિવસના સેલિબ્રેશનમાં પવન સિંહના ભોજપુરી ચાર્ટબસ્ટર સૉન્ગ ‘લૉલીપૉપ લાગેલૂ’ પર ક્રૂ-મેમ્બર્સ સાથે ધમાલ-ડાન્સ કરતો જોવા મળી રહ્યો છે.