22 September, 2022 11:52 AM IST | Mumbai | Gujarati Mid-day Online Correspondent
ગૌરી ખાન (સૌ: ઈન્સ્ટાગ્રામ)
કરણ જોહરનો ચેટ શો `કોફી વિથ કરણ 7` (Koffee with Karan) શરૂઆતથી જ સમાચારોમાં રહે છે. ગૌરી ખાન (Guari Khan) 17 વર્ષ બાદ ગુરૂવારે કોફી કોચ પર પરત ફરી હતી. ઇન્ટિરિયર ડિઝાઇનર અને અભિનેતા શાહરૂખ ખાનની પત્ની ગૌરી ખાન કરણ જોહરના ચેટ શોની સાતમી સીઝનના 12મા એપિસોડમાં મહિપ કપૂર અને ભાવના પાંડે સાથે જોવા મળી હતી અને તેના પુત્ર આર્યન ખાનના ડ્રગ કેસ (Aryan Khan Drugs Case) વિશે વાત કરી હતી.
ગત વર્ષે આર્યન ખાનની મુંબઈ પોલીસે ક્રૂઝ શિપમાં ડ્રગ્સ લઈ જવાની શંકામાં ધરપકડ કરી હતી. તેણે થોડા અઠવાડિયા જેલમાં ગાળ્યા અને આખરે તેની સામે પુરાવાના અભાવે જામીન પર મુક્ત કરવામાં આવ્યો હતો. કરણ જોહરે ગૌરી ખાન સાથે પુત્ર આર્યન ખાનની ધરપકડ વિશે વાત કરી હતા કે તેના પરિવારે તે સમયે આ મામલાને કેવી રીતે સંભાળ્યો હતો.
કરણે ગૌરીને પૂછયું કે, `તમારા માટે માત્ર પ્રોફેશનલી જ નહીં પરંતુ વ્યક્તિગત રીતે પરિવાર તરીકે આ મુશ્કેલ સમય રહ્યો છે. તમે બધા આમાંથી એક પરિવાર તરીકે ખૂબ મજબૂત રીતે બહાર આવ્યા છો. હું જાણું છું કે તે સરળ નથી. હું તમને એક માતા તરીકે ઓળખું છું અને અમે બધા એક જ પરિવારના સભ્યો છીએ. મને લાગે છે કે હું તમારા બાળકોનો પણ ગોડ પેરન્ટ છું. તે આસાન નહોતું પણ ગૌરી, મેં જોયું છે કે તને મોટા ભાગના કરતાં વધુ મજબૂત બહાર આવી છે. જ્યારે પરિવારો આના જેવા કંઈકમાંથી પસાર થાય છે ત્યારે મુશ્કેલ સમયને હેન્ડલ કરવાની તમારી રીત વિશે તમારું શું કહેવું છે?`
આના પર ગૌરી ખાને જવાબ આપ્યો, `હા, એક પરિવાર તરીકે, અમે આમાંથી પસાર થયા છીએ... મને લાગે છે કે એક માતા તરીકે, માતાપિતા તરીકે, અમે જે કંઈપણમાંથી પસાર થયા છીએ, તેનાથી વધુ ખરાબ કંઈ હોઈ શકે નહીં. પરંતુ આજે જ્યાં અમે એક પરિવાર તરીકે ઊભા છીએ, હું કહી શકું છું કે અમે એક સારી જગ્યાએ છીએ જ્યાં અમે બધા તરફથી પ્રેમ અનુભવીએ છીએ. સંદેશાઓ અને અમારા બધા મિત્રો તરફથી અને અમે જાણતા ન હતા તેવા ઘણા લોકો તરફથી ખૂબ જ પ્રેમ માટે હું ખૂબ જ ધન્ય અનુભવું છું. અને હું કહીશ કે આ સમય દરમિયાન અમને સાથ આપનાર તમામ લોકોનો હું આભારી છું.`