01 February, 2026 11:52 AM IST | Mumbai | Gujarati Mid-day Correspondent
બાહરિનના રૅપર ફ્લિપરાચીને ગિનેસ વર્લ્ડ રેકૉર્ડ્સ તરફથી પ્રમાણપત્ર એનાયત કરવામાં આવ્યું હતું
બાહરિનના પ્રખ્યાત રૅપર ફ્લિપરાચીના ગીત ‘ફાસલા’એ મોટી સફળતા મેળવી છે. Fa9la તરીકે ઓળખાતા આ અરબી સૉન્ગને ‘ધુરંધર’માં અક્ષય ખન્ના પર ફિલ્માવવામાં આવ્યું હતું. આ ગીતને બિલબોર્ડ અરેબિયા ચાર્ટ્સ પર ઐતિહાસિક સફળતા મળી છે જેને કારણે એને ગિનેસ વર્લ્ડ રેકૉર્ડ્સમાં સ્થાન મળ્યું છે.
આ ગીત ટૉપ ૧૦૦ આર્ટિસ્ટ, હૉટ ૧૦૦ ગીતો, ટૉપ ૫૦ ખલીજી અને ટૉપ ૫૦ અરેબિક હિપ-હૉપ એમ એકસાથે ચાર મુખ્ય બિલબોર્ડ અરેબિયા ચાર્ટ્સ પર નંબર વન પર પહોંચ્યું છે. આ રીતે એક જ ગીત દ્વારા સૌથી વધુ ચાર્ટ્સ પર ટૉપ પર રહેવાનો રેકૉર્ડ બન્યો છે. ગિનેસ વર્લ્ડ રેકૉર્ડ્સ અરેબિયાએ આને સત્તાવાર માન્યતા આપી છે.
ફ્લિપરાચીએ આ સફળતા બાદ એક વિડિયો શૅર કર્યો છે, જેમાં તે ખુશી વ્યક્ત કરતાં કહે છે, ‘ગિનેસ વર્લ્ડ રેકૉર્ડ્સ, હબીબી! આ ખૂબ અદ્ભુત અનુભવ છે. મને એ વાતનું આશ્ચર્ય છે કે આ ગીત જે ભાષામાં ગવાયું નથી એ ભાષાની ફિલ્મને કારણે આટલું લોકપ્રિય છે.’
ફિલ્મ ‘ધુરંધર’માં આ ગીત અક્ષય ખન્ના પર શૂટ થયું છે. ગીતની એનર્જી અને બીટ્સને કારણે એ અત્યંત લોકપ્રિય થઈ ગયું અને ગીત રિલીઝ થતાં જ આ ગીત રીલ્સ, શૉર્ટ્સ, મીમ્સ અને ડાન્સ-વિડિયોમાં વાઇરલ થઈ ગયું; જેનાથી ફિલ્મની સફળતામાં પણ મોટું યોગદાન મળ્યું છે.
