ઐશ્વર્યા-અભિષેકની રિલેશનશિપ વિશે હજી પણ ગજબનું કન્ફ્યુઝન

એક પારિવારિક રિસેપ્શનમાં ઍશની ગેરહાજરી બની વિવાદાસ્પદ, જ્યારે આશુતોષ ગોવારીકરના દીકરાનાં લગ્નમાં બન્ને લાગ્યાં પર્ફેક્ટ કપલ

અભિષેક બચ્ચન

અમિતાભ બચ્ચનના પરિવારમાં કોઈ સમસ્યા છે એ તો સ્પષ્ટ છે. છેલ્લા ઘણા સમયથી એવી ચર્ચા છે કે અભિષેક બચ્ચન અને ઐશ્વર્યા રાય ડિવૉર્સ લેવાનાં છે. જોકે બૉલીવુડના આ પાવર કપલે ક્યારેય આ વાતને કે સમાચારને નકાર્યા નથી કે પુષ્ટિ પણ આપી નથી. જોકે ઐશ્વર્યા અને દીકરી આરાધ્યા ઘણા મહત્ત્વપૂર્ણ પ્રસંગમાં બચ્ચન-પરિવાર સાથે જોવા નથી મળ્યાં. જોકે આ ચર્ચા વચ્ચે ક્યારેક-ક્યારેક અભિષેક અને ઐશ્વર્યાની જોડી જાહેરમાં દેખા દઈને એના પર ઠંડું પાણી રેડી દે છે. હાલમાં ફરી આવો જ ઘટનાક્રમ જોવા મળ્યો હતો.

તાજેતરમાં અમિતાભ બચ્ચનના મિત્ર રિકિન વર્માના દીકરાના વેડિંગ-રિસેપ્શનમાં અમિતાભ બચ્ચન, જયા બચ્ચન અને દીકરા અભિષેકે હાજરી આપી હતી અને હરખભેર ફોટો પણ ક્લિક કરાવ્યા હતા. જોકે આ રિસેપ્શનમાં ઐશ્વર્યા બચ્ચન હાજર નહોતી. એ ફોટો ઇન્ટરનેટ પર વાઇરલ થતાં ફરી પાછી ચર્ચા શરૂ થઈ હતી કે અભિષેક અને ઐશ્વર્યાએ ડિવૉર્સ લઈ લીધા અને માત્ર દીકરી આરાધ્યાના ઉછેર માટે જ સાથે જોવા મળે છે. 

હજી આ ચર્ચા વેગ પકડે એ પહેલાં અભિષેક અને ઐશ્વર્યા ડિરેક્ટર આશુતોષ ગોવારીકરના દીકરાનાં લગ્નમાં સાથે જોવા મળ્યાં હતાં. આ ફંક્શનની તેમની તસવીરો સોશ્યલ મીડિયામાં વાઇરલ થઈ છે. તેમણે આઇવરી આઉટફિટનું એકબીજા સાથે મૅચિંગ કર્યું હતું. તેમણે ભારે ઉલ્લાસપૂર્વક આ લગ્ન માણ્યાં હતાં અને નવદંપતી સાથે તેમ જ પરિવારના અન્ય સભ્યો સાથે ફોટો પણ ક્લિક કરાવ્યા હતા.