14 August, 2026 03:15 PM IST | Mumbai | Gujarati Mid-day Online Correspondent
અજય દેવગન માતા વીણા અને પત્ની કાજોલ સાથે (ફાઈલ તસવીર)
બોલિવૂડ (Bollywood) અભિનેતા અજય દેવગન (Ajay Devgn) અને તેમના માતા વીણા દેવગન (Veena Devgn) મુંબઈ (Mumbai) ના પોશ વિસ્તાર જુહૂ (Juhu) માં આવેલો પોતાનો સ્વતંત્ર રહેણાંક બંગલો ભાડે આપ્યો છે. રિયલ એસ્ટેટ પ્લેટફોર્મ `સ્ક્વેર યાર્ડ્સ` (Square Yards) દ્વારા વિશ્લેષણ કરાયેલા પ્રોપર્ટી રજીસ્ટ્રેશન દસ્તાવેજો અનુસાર, ૫ વર્ષના આ લીઝ કરારથી દેવગન પરિવારને તેની સમગ્ર મુદત દરમિયાન કુલ આશરે રુપિયા ૧૦.૬૧ કરોડની ગ્રોસ ભાડાની આવક થશે.
દેવગન પરિવાર દ્વારા ભાડે આપવામાં આવેલો (Ajay Devgn Juhu bungalow lease) આ ગ્રાઉન્ડ-પ્લસ-વન (બે માળનો) સ્વતંત્ર બંગલો જુહૂના કપોળ હાઉસિંગ સોસાયટી રોડ પર આવેલો છે, જે ૭,૮૦૩ ચોરસ ફૂટ કાર્પેટ એરિયા અને આશરે ૮,૪૦૦ ચોરસ ફૂટ બિલ્ટ-અપ એરિયા ધરાવે છે. આ વિસ્તાર અમિતાભ બચ્ચન, ઋતિક રોશન, ધર્મેન્દ્ર અને અક્ષય કુમાર સહિતના જાણીતા ફિલ્મી કલાકારો અને ઉદ્યોગપતિઓના ઘર માટે પ્રખ્યાત છે.
આ બંગલો મુંબઈના પશ્ચિમી ઉપનગરોના મુખ્ય સ્થળો જેવા કે જુહૂ બીચ, JVPD સ્કીમ અને મુખ્ય વ્યાપારી કેન્દ્રોની નજીક આવેલો છે.
આ સોદો ૧ ઓગસ્ટ, ૨૦૨૬ ના રોજ સત્તાવાર રીતે રજીસ્ટર થયો હતો. કરારમાં વીણા દેવગન અને `દેવગન એન્ટરટેઇનમેન્ટ એન્ડ સોફ્ટવેર લિમિટેડ` મકાનમાલિક તરીકે દર્શાવવામાં આવ્યા છે, જ્યારે નિહારિકા પોદ્દારને ભાડૂઆત તરીકે નામંકિત કરવામાં આવ્યા છે.
૬૦ મહિના (૫ વર્ષ) ના આ લીઝ કરારમાં ક્રમશઃ ભાડા વધારાનું મોડેલ રાખવામાં આવ્યું છે:
૧ થી ૩૬ મહિના: શરૂઆતનું માસિક ભાડું રુપિયા ૧૬ લાખ નક્કી કરવામાં આવ્યું છે.
૩૭ થી ૬૦ મહિના: ભાડામાં ૧૦ ટકા નો વધારો થઈને પ્રતિ માસ રુપિયા ૧૭.૬ લાખ થશે.
કરાર અંતર્ગત, ભાડૂઆતે શરૂઆતના છ મહિનાના ભાડા જેટલી રુપિયા ૯૬ લાખની એડવાન્સ સિક્યોરિટી ડિપોઝિટ જમા કરાવી છે. આ સોદા માટે રુપિયા ૨,૮૮,૪૦૦ ની સ્ટેમ્પ ડ્યુટી અને રુપિયા ૧,૦૦૦ ની સ્ટાન્ડર્ડ રજીસ્ટ્રેશન ફી ચૂકવવામાં આવી હતી.
આ લીઝ સોદો મુંબઈના પ્રાઇમ રિયલ એસ્ટેટ માર્કેટમાં દેવગન પરિવારની સતત સક્રિયતા દર્શાવે છે. ૨૦૨૧ માં, અજય દેવગને તેમના મુખ્ય નિવાસસ્થાન `શિવ શક્તિ` નજીક જુહૂની કપોળ સોસાયટીમાં ૫૯૦ ચોરસ વારનો બંગલો રુપિયા ૪૭.૫ કરોડમાં ખરીદ્યો હતો. આ ઉપરાંત, ૨૦૨૩ માં અભિનેતાએ અંધેરી વેસ્ટના ઓશિવારામાં પાંચ યુનિટ્સમાં ફેલાયેલી ૧૩,૨૯૩ ચોરસ ફૂટથી વધુની કોમર્શિયલ ઓફિસ સ્પેસ રુપિયા ૪૫ કરોડથી વધુની કિંમતે ખરીદી હતી.
પરિવારની વ્યૂહરચના મુંબઈના પ્રાઇમ વિસ્તારોમાં લક્ઝરી રહેણાંક સંપત્તિઓ ધરાવવાની સાથે સાથે હાઈ-યીલ્ડિંગ વ્યાપારી અને ભાડાની મિલકતો વિકસાવવાની રહી છે.
