13 August, 2019 08:11 PM IST | મુંબઈ
રૅપર હાર્દ કોરને દેશના વડાપ્રધાન નરેન્દ્ર મોદી અને ગૃહ પ્રધાન અમિત શાહ વિરુદ્ધ વાંધાજનક ભાષાનો ઉપયોગ કરવો ભારે પડ્યો છે. ટ્વિટરે હાર્દ કૌરનું અકાઉન્ટ સસ્પેન્ડ કરી નાખ્યું છે. આ અકાઉન્ટથી એક વીડિયો શૅર કરવામાં આવ્યો હતો, જેમાં હાર્દ કૌરે બંને માટે ખૂબ જ અભદ્ર ભાષાનો ઉપયોગ કર્યો હતો. આ વીડિયોમાં હાર્દ કૌરની સાથે કેટલાક ખાલિસ્તાની સમર્થકો પણ દેખાયા હતા, જે તેની હામાં હા મિલાવતા હતા.
લગભગ 2.20 મિનિટની આ ક્લિપમાં હાર્દ કૌરે પીએમ મોદી અને અમિત શાહને પડકાર આપ્યો હતો. જોત જોતામાં આ વીડિયો વાઈરલ થયો અને ટ્વિટર પર હાર્દ કૌર આખો દિવસ ટ્રેન્ડિંગ રહી હતી. આ વીડિયોને ટ્વિટર પર પોસ્ટ કર્યા બાદ હાર્દ કૌરે પોતાના ઈન્સ્ટાગ્રામ પર એક ગીતનો પ્રમોશનલ વીડિયો શૅર કર્યો હતો, જેનું ટાઈટર વી આર વૉરિયર્સ છે. આ વીડિયોમાં પણ ખાલિસ્તાની સમર્થકો દેખાઈ રહ્યા છે.
જૂન મહિનામાં હાર્દ કૌર વિરુદ્ધ યુપીના સીએમ યોગી આદિત્યનાથ અને RSSના ચીફ મોહન ભાગવત વિરુદ્ધ અપશબ્દોનો ઉપયોગ કરવા બદલ દેશદ્રોહનો ગુનો નોંધાયો હતો. આ મામલે આઈપીસીની કલમ 124એ, 153એ, 500 અને 505 અંતર્ગત FIR પણ નોંધવામાં આવી હતી.
આ પણ વાંચોઃ જુઓ અમિતાભ બચ્ચનની પુત્રી શ્વેતા બચ્ચનના લગ્નના અનસીન ફોટોઝ
ઉલ્લેખનીય છે કે હાર્દ કૌરે જૉની ગદ્દારમાં મૂવ યૉર બોડી, બચના એ હસીનોમાં લકી બૉય જેવા ગીતો ગાઈ ચૂકી છે. અક્ષયકુમારની 2011ની ફિલ્મ પટિયાલા હાઉસમાં હાર્દ કૌરે એક્ટિંગ પણ કરી હતી.