30 November, 2022 12:27 PM IST | Doha | Gujarati Mid-day Correspondent
લિયોનેલ મેસી અને રૉબર્ટ લેવાન્ડૉવ્સ્કી
લિયોનેલ મેસીના આર્જેન્ટિના અને રૉબર્ટ લેવાન્ડૉવ્સ્કીના પોલૅન્ડ વચ્ચે આજે (ભારતીય સમય મુજબ રાતે ૧૨.૩૦ વાગ્યાથી) કતારના વર્લ્ડ કપમાં ખરાખરીનો જંગ થશે. નવાઈની વાત એ છે કે આર્જેન્ટિનાનો આ વિશ્વકપના પહેલા મુકાબલામાં સાઉદી અરેબિયા સામે ૧-૨થી પરાજય થયો ત્યાર પછી પોલૅન્ડે સાઉદી અરેબિયાને ૨-૦થી હરાવ્યું હતું. એ જોતાં આજે પણ પોલૅન્ડ જીતશે તો નવાઈ નહીં લાગે, પરંતુ ઇતિહાસ આર્જેન્ટિનાના પડખે છે.
૧૯૬૬થી ૨૦૧૧ની સાલ સુધી આર્જેન્ટિના-પોલૅન્ડ વચ્ચે કુલ ૧૧ વાર ટક્કર થઈ છે, જેમાંથી ૬ મૅચમાં આર્જેન્ટિનાનો અને ૩ મૅચમાં પોલૅન્ડનો વિજય થયો છે. બે મૅચ ડ્રૉ રહી છે. જોકે ૧૧માંથી ૮ મૅચ ઇન્ટરનૅશનલ ફ્રેન્ડલી મૅચ હતી, જ્યારે ફિફા વર્લ્ડ કપમાં એમની વચ્ચે જે બે ટક્કર થઈ છે એમાં બન્ને ટીમ ૧-૧ વિજય સાથે બરાબરીમાં છે.
વર્તમાન વિશ્વકપમાં ગ્રુપ ‘સી’માં પોલૅન્ડ ૪ પૉઇન્ટ સાથે મોખરે છે અને આર્જેન્ટિનાના ૩ પૉઇન્ટ છે. બન્ને દેશની આજે ગ્રુપ-સ્ટેજની છેલ્લી મૅચ છે અને એમાં જીતીને ત્રણ પૉઇન્ટ મેળવવા બન્ને માટે જરૂરી છે. સાઉદી અરેબિયા (૩ પૉઇન્ટ) ત્રીજા સ્થાને અને મેક્સિકો (૧ પૉઇન્ટ) ચોથે છે.
આ વર્લ્ડ કપમાં પહેલી બન્ને મૅચમાં ગોલ કરનાર મેસી આજે પણ ગોલ કરીને આર્જેન્ટિનાને જિતાડવા કોઈ કસર નહીં બાકી રાખે. તેની જેમ લેવાન્ડૉવ્સ્કીનો પણ આ કદાચ છેલ્લો વર્લ્ડ કપ છે. મેસીએ ૨૦૨૨ના કૅલેન્ડર યરમાં આર્જેન્ટિના વતી ૧૩ ગોલ કર્યા છે જે તેનો કરીઅર-બેસ્ટ રેકૉર્ડ છે.
11
આર્જેન્ટિના અને પોલૅન્ડની ટીમ આટલાં વર્ષે ફરી ટકરાશે. છેલ્લે ૨૦૧૧માં પોલૅન્ડનો ૨-૧થી વિજય થયો હતો.
મને લાગે છે કે હવે જાણે બીજો વર્લ્ડ કપ શરૂ થઈ રહ્યો છે. શરૂઆતના રોમાંચક મુકાબલા બાદ હવે ખરાખરીના જંગ થઈ રહ્યા છે. : લિયોનેલ મેસી