07 May, 2022 01:08 PM IST | Mumbai | Gujarati Mid-day Correspondent
સોની એન્ટરટેઇનમેન્ટ ચૅનલ પર આજે રાતે ૯.૩૦ વાગ્યે ‘ધ કપિલ શર્મા શો’માં ‘વિમેન ઇન બ્લુ’ તરીકે જાણીતી ભારતની ટોચની મહિલા ક્રિકેટરો જોવા મળશે. આ સ્ટૅન્ડ-અપ કૉમેડી શોમાં તેઓ પણ કપિલ અને તેમના સાથીકલાકારો સાથે હસી-મજાકની મહેફિલમાં જોડાશે. એટલું જ નહીં, આ વર્લ્ડ-ક્લાસ ખેલાડીઓ અભિનેતા અલ્લુ અર્જુનની ‘પુષ્પા’- સ્ટાઇલથી પણ સૌકોઈનું મન મોહી લેશે. આ શોમાં હાજર રહેનારી પ્લેયર્સમાં હરમનપ્રીત કૌર, ઝુલન ગોસ્વામી, પૂજા વસ્ત્રાકર, મેઘના સિંહ, સ્નેહ રાણા, યાસ્તિકા ભાટિયા અને શેફાલી વર્મા સામેલ હશે.
ઓન્સ જેબોર વિમેન્સ ટેનિસ અસોસિએશન (ડબ્લ્યુટીએ)-૧૦૦૦ ઇવેન્ટની ફાઇનલમાં પહોંચેલી પ્રથમ આરબ પ્લેયર બની છે. તેણે મૅડ્રિડ ઓપનમાં આ સિદ્ધિ મેળવી છે. ટ્યુનિશિયાની જેબોરે સેમી ફાઇનલમાં એકાટેરિના ઍલેક્ઝાંડ્રોવાને ૬૧ મિનિટમાં ૬-૨, ૬-૩થી હરાવીને ફાઇનલમાં એન્ટ્રી કરી છે. એ.એન.આઇ.ના અહેવાલ મુજબ જેબોર કુલ મળીને ૬ સ્પર્ધાની ફાઇનલમાં રમી ચૂકી છે, પરંતુ એમાંની એકેય સ્પર્ધા ડબ્લ્યુટીએ-૧૦૦૦ સ્તરની નહોતી.
ચીનના હાન્ગઝો શહેરમાં આગામી ૧૦થી ૨૫ સપ્ટેમ્બર દરમ્યાન યોજાનારી એશિયન ગેમ્સ કોવિડ-19ના ચીનમાં વધી રહેલા કેસને ધ્યાનમાં લેતાં અનિશ્ચિત મુદત માટે મુલતવી રાખવામાં આવી છે. ચીનમાં અને ખાસ કરીને શાંઘાઈમાં છેલ્લા થોડા દિવસમાં કોરોના વાઇરસનો ફરી ફેલાવો થતાં આ રમતોત્સવ મોકૂફ રહેશે એવી ધારણા હતી જ. ભારતમાં ઘણા ઍથ્લીટોએ આ ગેમ્સ માટેની પ્રૅક્ટિસ-ટ્રેઇનિંગ શરૂ કરી દીધી હતી.
ડિસેમ્બરમાં વાનખેડેમાં ભારત સામેની ટેસ્ટના એક દાવમાં દસેદસ વિકેટ લેવાના જિમ લેકર તથા અનિલ કુંબલેના વિશ્વવિક્રમની બરાબરી કરનાર ન્યુ ઝીલૅન્ડનો સ્પિનર અજાઝ પટેલ એ દાવમાં પોતે પહેરેલા શર્ટની હરાજી કરી રહ્યો છે. તે આ શર્ટના ઑક્શનમાંથી મળનારી રકમ ન્યુ ઝીલૅન્ડની બાળકો માટેની હૉસ્પિટલને દાનમાં આપી દેશે. ભારતના એ પ્રવાસની ટેસ્ટ ટીમના દરેક મેમ્બરે એ શર્ટ પર ઑટોગ્રાફ આપ્યા હતા.