ન્યુ ઝીલૅન્ડનો નેટ રન-રેટ માઇનસથી પ્લસ થતાં સેમી ફાઇનલની રેસ રસપ્રદ બની

એશિયા કપ 2024ની ચૅમ્પિયન ટીમ શ્રીલંકા આ વર્લ્ડ કપમાં એક પણ મૅચ જીત્યા વગર સતત ચાર મૅચમાં કારમી હાર સાથે સ્વદેશ પરત ફરી રહી

ટીમ શ્રીલંકા

ગઈ કાલે બપોરે ન્યુ ઝીલૅન્ડની વિમેન્સ ટીમે શ્રીલંકાને આઠ વિકેટે હરાવી હતી. આ સાથે જ એશિયા કપ 2024ની ચૅમ્પિયન ટીમ શ્રીલંકા આ વર્લ્ડ કપમાં એક પણ મૅચ જીત્યા વગર સતત ચાર મૅચમાં કારમી હાર સાથે સ્વદેશ પરત ફરી રહી છે. આ જીત સાથે ન્યુ ઝીલૅન્ડનો નેટ રન-રેટ -૦.૦૫૦થી +૦.૨૮૨ થયો છે. ત્રણ મૅચમાં ચાર પૉઇન્ટ સાથે ન્યુ ઝીલૅન્ડની ટીમ પૉઇન્ટ્સ-ટેબલમાં ત્રીજા ક્રમે છે.

આજે ભારત-ઑસ્ટ્રેલિયાની અને આવતી કાલે ૧૪ ઑક્ટોબરે ન્યુ ઝીલૅન્ડ-પાકિસ્તાનની મૅચથી સેમી ફાઇનલની ટૉપ-ટૂ ટીમ નક્કી થશે. જો ભારત અને ન્યુ ઝીલૅન્ડની ટીમ જીતશે તો ઑસ્ટ્રેલિયા સામે તેમના પણ ૬ પૉઇન્ટ થશે અને નેટ રન-રેટથી સેમી ફાઇનલિસ્ટ નક્કી થશે. જો ભારત અને ન્યુ ઝીલૅન્ડ મૅચ હારશે તો ઑસ્ટ્રેલિયા ૮ પૉઇન્ટ સાથે ગ્રુપAમાં પહેલી સેમી ફાઇનલિસ્ટ બનશે, જ્યારે પાકિસ્તાનના પણ ચાર પૉઇન્ટ થતાં જ નેટ રન-રેટના આધારે ભારત, ન્યુ ઝીલૅન્ડ અને પાકિસ્તાનમાંથી બીજી સેમી ફાઇનલિસ્ટ ટીમ નક્કી થશે. ટૂંકમાં દરેક ટીમે સેમી ફાઇનલિસ્ટ બનવા માટે મોટા માર્જિનથી મૅચ જીતવી પડશે. 

ગ્રુપ Aનું પૉઇન્ટ્સ-ટેબલ
ઑસ્ટ્રેલિયા (+૨.૭૮૬) - ત્રણ મૅચમાં ૬ પૉઇન્ટ
ભારત (+૦.૫૭૬) - ત્રણ મૅચમાં ચાર પૉઇન્ટ
ન્યુ ઝીલૅન્ડ (+૦.૨૮૨) - ત્રણ મૅચમાં ચાર પૉઇન્ટ
પાકિસ્તાન (-૦.૪૮૮) - ત્રણ મૅચમાં બે પૉઇન્ટ
શ્રીલંકા (-૨.૧૭૩) - ચાર મૅચમાં શૂન્ય 
પૉઇન્ટ