કોણ બોલર બનવા માગશે?

૪૦ ઓવરમાં ૫૪૯ રન બન્યા એ જોઈને સચિન તેન્ડુલકરે કહ્યું...

સચિન તેંડુલકર , પૅટ કમિન્સ

એમ. ચિન્નાસ્વામી સ્ટેડિયમમાં સનરાઇઝર્સ હૈદરાબાદે ૩ વિકેટે ૨૮૭ રન ફટકારીને ઇન્ડિયન પ્રીમિયર લીગ (IPL) ઇતિહાસના સૌથી મોટા સ્કોર ૨૭૭ રનનો પોતાનો જ રેકૉર્ડ તોડ્યો હતો. ફ્રૅન્ચાઇઝી ક્રિકેટનો સૌથી મોટો સ્કોર ખડકવાની સાથે જ હૈદરાબાદે અફઘાનિસ્તાનનો ૩ વિકેટે ૨૭૮ના સ્કોરનો રેકૉર્ડ તોડી T20 ઇતિહાસનો બીજો સૌથી મોટો સ્કોર પોતાના નામે કર્યો હતો. ૨૨ સિક્સર અને ૧૯ ચોગ્ગાની મદદથી હૈદરાબાદ IPLમાં ૨૭૦ પ્લસનો સ્કોર બે વાર કરનારી પ્રથમ ટીમ બની છે. એક IPL સીઝનમાં ૨૫૦ પ્લસનો સ્કોર બે વાર કરનાર હૈદરાબાદે એક ઇનિંગ્સમાં સૌથી વધુ બાવીસ સિક્સર ફટકારવાનો રેકૉર્ડ પણ પોતાના નામે કર્યો હતો. રન ચેઝ કરવા ઊતરેલી રૉયલ ચૅલેન્જર્સ બૅન્ગલોરે ૭ વિકેટે ૨૬૨ રન કરતાં એક T20 મૅચમાં સૌથી વધુ ૫૪૯ રનનો વર્લ્ડ રેકૉર્ડ બન્યો હતો. ૧૭મી સીઝનની ૩૦મી મૅચમાં કુલ ૮૧ બાઉન્ડરી જોવા મળી જેણે ૨૦૨૩ના વેસ્ટ ઇન્ડીઝ અને સાઉથ આફ્રિકાની મૅચના સૌથી વધુ T20 મૅચની બાઉન્ડરીના રેકૉર્ડની બરાબરી કરી હતી. હૈદરાબાદ અને મુંબઈની મૅચના સૌથી વધારે ૩૮ સિક્સરના રેકૉર્ડની બરાબરી પણ આ મૅચમાં થઈ હતી. ૩૦ વર્ષના ઑસ્ટ્રેલિયન બૅટ્સમૅન ટ્રૅવિસ હેડે ૩૯ બૉલમાં ફાસ્ટેસ્ટ અને ઑવરઓલ ચોથી ફાસ્ટેસ્ટ સેન્ચુરી ફટકારી હતી. ૧૦૦ સદી ફટકારનાર માસ્ટર બ્લાસ્ટર સચિન તેન્ડુલકરે સોશ્યલ મીડિયા પર લખ્યું, ‘બન્ને ટીમે પાવર હિટિંગનું શાનદાર પ્રદર્શન કર્યું હતું. ૪૦ ઓવરમાં ૫૪૯ રન. હવે કોણ બોલર બનવા માગશે?’ જોકે ઑસ્ટ્રેલિયન ફાસ્ટ બોલર પૅટ કમિન્સે મૅચ બાદ બૅટ્સમૅન બનવાની ઇચ્છા વ્યક્ત કરી હતી. 

T20 મૅચમાં સૌથી વધારે બાઉન્ડરી
બાઉન્ડરી	મૅચ	વર્ષ
૮૧	હૈદરાબાદ વિરુદ્ધ બૅન્ગલોર	૨૦૨૪
૮૧	વેસ્ટ ઇન્ડીઝ વિરુદ્ધ સાઉથ આફ્રિકા	૨૦૨૩
૭૮	મુલતાન સુલતાન વિરુદ્ધ ક્વેટા ગ્લૅડિયેટર્સ	૨૦૨૩

 

T20 મૅચમાં સૌથી વધુ રન
રન	મૅચ	વર્ષ
૫૪૯	હૈદરાબાદ વિરુદ્ધ બૅન્ગલોર	૨૦૨૪
૫૨૩	હૈદરાબાદ વિરુદ્ધ મુંબઈ	૨૦૨૪
૫૧૭	વેસ્ટ ઇન્ડીઝ વિરુદ્ધ સાઉથ આફ્રિકા	૨૦૨૩
૫૧૫	મુલતાન સુલતાન વિરુદ્ધ ક્વેટા ગ્લૅડિયેટર્સ રાવલપિંડી	૨૦૨૩
૫૦૬	સરે વિરુદ્ધ મિડલસેક્સ	૨૦૨૩

 

T20 મૅચમાં સૌથી વધુ સિક્સર
સિક્સર	મૅચ	વર્ષ
૩૮	હૈદરાબાદ વિરુદ્ધ બૅન્ગલોર	૨૦૨૪
૩૮	હૈદરાબાદ વિરુદ્ધ મુંબઈ	૨૦૨૪
૩૭	બલ્ખ લેજન્ડ્સ વિરુદ્ધ કાબુલ ઝવાન શારજાહ	૨૦૧૮
૩૭	જમૈકા તલ્લાવાહ વિરુદ્ધ નેવિસ પૅટ્રિયટ્સ બેસેટેરે	૨૦૧૯

 

IPL ઇનિંગ્સમાં સૌથી વધુ સિક્સર
સિક્સર	મૅચ	વર્ષ
૨૨	હૈદરાબાદ વિરુદ્ધ બૅન્ગલોર	૨૦૨૪
૨૧	બૅન્ગલોર વિરુદ્ધ પુણે	૨૦૧૩
૨૦	બૅન્ગલોર વિરુદ્ધ ગુજરાત	૨૦૧૬
૨૦	દિલ્હી વિરુદ્ધ ગુજરાત	૨૦૧૭
૨૦	હૈદરાબાદ વિરુદ્ધ મુંબઈ	૨૦૨૪

 

IPLમાં એક ઇનિંગ્સમાં સૌથી વધુ સ્કોર
સ્કોર	ટીમ	વિરોધી ટીમ	વર્ષ
૨૮૭/૩	હૈદરાબાદ	બૅન્ગલોર	૨૦૨૪
૨૭૭/૩	હૈદરાબાદ	મુંબઈ	૨૦૨૪
૨૭૨/૭	કલકત્તા	દિલ્હી	૨૦૨૪
૨૬૩/૫	બૅન્ગલોર	પુણે	૨૦૧૩
૨૬૨/૭	બૅન્ગલોર	હૈદરાબાદ	૨૦૨૪