ઇન્ડોનેશિયા વિમેન્સ એશિયા કપમાંથી આઉટ, સેમી-ફાઇનલની આશા જાળવી રાખી UAEએ

વિમેન્સ T20 એશિયા કપ 2026માં ઇન્ડોનેશિયા ત્રણેય ગ્રુપ મૅચ હારીને ટુર્નામેન્ટમાંથી બહાર થનારી પ્રથમ ટીમ બની. UAEએ 6 વિકેટે જીત મેળવી સેમી-ફાઇનલની આશા જીવંત રાખી.

UAEની ભારતીય મૂળની કૅપ્ટન એશા ઓઝા ઑલરાઉન્ડ પ્રદર્શન કરીને પ્લેયર ઑફ ધ મૅચ બની.

વિમેન્સ T20 એશિયા કપમાં ડેબ્યુ કરનાર ઇન્ડોનેશિયા વર્તમાન સીઝનમાંથી આઉટ થનાર પહેલી ટીમ બની છે. ઇન્ડોનેશિયાને ગ્રુપ Bમાં તમામ ત્રણ મૅચમાં હાર મળી હતી. શુક્રવારે દુબઈમાં યજમાન UAEએ ઇન્ડોનેશિયાને ૬ વિકેટે હરાવીને સેમી-ફાઇનલની આશા જાળવી રાખી હતી.
ઇન્ડોનેશિયા ૧૯.૪ ઓવરમાં ૭૧ રન કરીને ઑલઆઉટ થયું હતું. જવાબમાં UAEએ ૧૩.૧ ઓવરમાં ૭૫/૪નો સ્કોર કરીને ૭૨ રનનો ટાર્ગેટ ચેઝ કરી લીધો હતો. UAEની ભારતીય મૂળની કૅપ્ટન એશા ઓઝાએ બે વિકેટ લઈને ૨૯ બૉલમાં ૩૦ રન કરવા બદલ પ્લેયર ઑફ ધ મૅચનો અવૉર્ડ જીત્યો હતો. 
આજે વિમેન્સ T20 એશિયા કપ 2026ની દસમી મૅચ શ્રીલંકા અને બંગલાદેશ વચ્ચે રમાશે. આ મૅચના રિઝલ્ટ પછી ગ્રુપ Bની સેમી-ફાઇનલની ટીમો માટેનું ચિત્ર સ્પષ્ટ થશે.