T20 ઇન્ટરનૅશનલમાં નર્વસ નાઇન્ટીનો શિકાર બનનાર પહેલો અંગ્રેજ વિકેટકીપર-બૅટર બન્યો જૉસ બટલર

વેસ્ટ ઇન્ડીઝની ટીમે ૧૮૯ રનના ટાર્ગેટ સામે નવ વિકેટ ગુમાવીને ૧૬૭ રન ફટકારીને હાર સાથે સિરીઝની શરૂઆત કરી હતી. સિરીઝની અંતિમ બે મૅચ આજે ૮ જૂન અને ૧૦ જૂને રમાશે.

જૉસ બટલર

ભારતીય સમય અનુસાર શુક્રવારે મોડી રાત્રે શરૂ થયેલી ત્રણ મૅચની સિરીઝની પહેલી T20 મૅચમાં વેસ્ટ ઇન્ડીઝને ૨૧ રને ઇંગ્લૅન્ડ સામે હારી મળી હતી. ઇંગ્લૅન્ડે ૬ વિકેટે ૧૮૮ રન બનાવ્યા હતા, વેસ્ટ ઇન્ડીઝની ટીમે ૧૮૯ રનના ટાર્ગેટ સામે નવ વિકેટ ગુમાવીને ૧૬૭ રન ફટકારીને હાર સાથે સિરીઝની શરૂઆત કરી હતી. સિરીઝની અંતિમ બે મૅચ આજે ૮ જૂન અને ૧૦ જૂને રમાશે.

ઇંગ્લૅન્ડ માટે ત્રીજા ક્રમે આવીને જૉસ બટલરે ૫૯ બૉલમાં ૬ ફોર અને ચાર સિક્સની મદદથી ૯૬ રનની ધમાકેદાર ઇનિંગ્સ રમી હતી. જોકે ૧૯મી ઓવરમાં LBW આઉટ થતાં તે ચાર રનથી પોતાની બીજી T20 ઇન્ટરનૅશનલ સદી ચૂક્યો હતો. આ સાથે તે આ ફૉર્મેટમાં ઇંગ્લૅન્ડ તરફથી નર્વસ નાઇન્ટીનો શિકાર થનાર પહેલો વિકેટકીપર-બૅટર બની ગયો છે. સ્પિનર લિયામ ડૉસન (૨૦ રનમાં ચાર વિકેટ) ઇંગ્લૅન્ડ માટે આ ફૉર્મેટમાં શ્રેષ્ઠ પ્રદર્શન કરીને પ્લેયર ઑફ ધ મૅચ બન્યો હતો.