11 October, 2021 05:57 PM IST | Mumbai | Gujarati Mid-day Online Correspondent
એમએસ ધોની
ઇન્ડિયન પ્રીમિયર લીગ (IPL)ના ક્વોલિફાયર-૧માં એમએસ ધોનીએ ચેન્નઈ સુપર કિંગ્સ માટે વિનિંગ રન બનાવ્યા બાદ ધોનીના ચાહકો અને સમર્થકોએ ઉજવણીના ટ્વીટ્સ અને મીમ્સ સાથે સોશિયલ મીડિયાને છલકાવી દીધું હતું. દુબઈ સ્ટેડિયમના કેમેરાએ ટીમની જીત પર આનંદ વ્યક્ત કરતા ઘણા ચાહકોની પ્રતિક્રિયાઓ પણ કેદ કરી હતી. જોકે, બે યુવા ચાહકોનો વીડિયો ખૂબ વાયરલ થયો છે, જે ટીમના વિજય બાદ પોતાના હર્ષના આંસુ રોકી શક્યા ન હતા. તે ખુદ ધોની સહિત ઘણા લોકોના ધ્યાનમાં આવ્યા હતા, ત્યાર બાદ ધોનીએ આ બાળકોને પોતાના ઑટોગ્રાફ વાળો બોલ ભેટ આપીને તેમના માટે આ ક્ષણ યાદગાર બનાવી દીધી હતી.
એક વીડિયોમાં, જે હવે સોશિયલ મીડિયા પર વ્યાપકપણે પ્રસારિત થઈ રહ્યો છે, બે બાળકો ચેન્નાઈ સુપર કિંગ્સના વિજય બાદ ઉજવણી કરી રહ્યા છે.
અન્ય એક ક્લિપમાં, 40 વર્ષીય CSK કેપ્ટન બે બાળકોને ઓટોગ્રાફ્ડ બોલ ગિફ્ટ કરતા જોવા મળે છે. વાયરલ વીડિયો શેર કરતી વખતે એક યુઝરે ટ્વિટ કર્યું જેમાં ધોની બે બાળકોને બોલ આપતા જોવા મળે છે, જે ભેટ મળ્યા પછી સ્પષ્ટ રીતે બાળકો આનંદિત થયા છે.
ઓનલાઈન શેર થયા બાદથી, બંને વીડિયો વાયરલ થયા છે જેમાં ઘણાએ યુવા ચાહકો પ્રત્યે ધોનીના મીઠા ભાવની પ્રશંસા કરી છે.