પુજારાના અણનમ ૧૨૫, કાઉન્ટીમાં સાતમી ઇનિંગ્સમાં ચોથી સેન્ચુરી કરી

પહેલી ઇનિંગ્સમાં તે ફક્ત ૧૬ રન બનાવી શક્યો હતો, પણ બીજી ઇનિંગ્સમાં કસર પૂરી કરી લીધી હતી

ચેતેશ્વર પુજારા

છેલ્લા કેટલાય સમયથી ઇન્ટરનૅશનલ અને ડોમેસ્ટિક ક્રિકેટમાં નબળા પર્ફોર્મન્સને ભૂલવા અને ભુલાવી દેવા ઇંગ્લિશ કાઉન્ટી રમવા ગયેલો સૌરાષ્ટ્રનો ચેતેશ્વર પુજારા ભારે કમાલ કરી રહ્યો છે. પુજારા સસેક્સ વતી રમતાં મિડલસેક્સ સામે ત્રીજા દિવસે બીજી ઇનિંગ્સમાં ૧૪૯ બૉલમાં બે સિક્સર અને ૧૬ ફોર સાથે અણનમ ૧૨૫ રનની લાજવાબ ઇનિંગ્સ રમ્યો હતો. પહેલી ઇનિંગ્સમાં તે ફક્ત ૧૬ રન બનાવી શક્યો હતો, પણ બીજી ઇનિંગ્સમાં કસર પૂરી કરી લીધી હતી. બીજી ઇનિંગ્સમાં તેની ટીમ ૧.૧ ઓવરમાં ૬ રનમાં બે વિકેટ ગુમાવીને મુશ્કેલીમાં મુકાઈ ગઈ હતી, પણ પુજારા ટૉમ ઍલસોપ (૬૬) સાથે ૧૩૮ રનની અને ત્યાર બાદ ટૉમ ક્લાર્ક (અણનમ ૨૬) સાથે અણનમ ૯૬ રનની પાર્ટનરશિપ સાથે ટીમની વહારે આવ્યો હતો. ‍પુજારાએ પાકિસ્તાનના બોલર શાહિદ શાહ આફ્રિદીની અપર કટ દ્વારા મારેલી સિક્સરે પણ ચાહકોનાં દિલ જીતી લીધાં હતાં.

શ્રીલંકા સામેની સિરીઝમાંથી ડ્રૉપ થયા બાદ ફરી લય મેળવવા કાઉન્ટી રમવા ગયેલા પુજારાએ અત્યાર સુધી સાત ઇનિંગ્સમાં બે ડબલ સેન્ચુરી અને બે સેન્ચુરી સાથે ૬૬૨ રન ખડકી દીધા છે.