કેસરી રંગથી રંગાયેલા શૌચાલયની લોકોએ મંદિર સમજીને એક વર્ષ સુધી પૂજા કરી

કેસરી રંગથી રંગાયેલા શૌચાલયની લોકોએ મંદિર સમજીને એક વર્ષ સુધી પૂજા કરી

શૌચાલય કે મંદિર

ઉત્તર પ્રદેશના હમીરપુર જિલ્લામાં એક અજીબોગરીબ ઘટના બની છે. આ વિસ્તારના લોકો કેસરી રંગથી રંગાયેલા એક મકાનના દરવાજાની બહાર પૂજા કરતા હતા. જોકે આ મકાન તો મંદિરને બદલે શૌચાલય નીકળ્યું હતું.
હમીરપુર જિલ્લાના મૌદહા વિસ્તારના લોકો એક વર્ષથી વધારે સમયથી એક મકાનના દરવાજાની બહાર પૂજા-અર્ચના કરી રહ્યા હતા. આશ્ચર્યજનક વાત તો એ છે કે આ તમામ લોકોને જાણ જ નહોતી કે આ મકાનની અંદર કોઈ દેવી-દેવતા સ્થાપિત છે કે નહીં.
એક સ્થાનિક રહેવાસી રાકેશ ચંદેલે જણાવ્યું કે ‘આ મકાન સામૂહિક સ્વાસ્થ્ય કેન્દ્ર પરિસરમાં છે. આ મકાનને કેસરી રંગથી રંગવામાં આવ્યું છે અને એને મંદિરના આકારનું બનાવાયું છે. એને કારણે લોકો આને મંદિર સમજતા હતા. જોકે કોઈએ આ વિશે તપાસ કરવાની જહેમત નહોતી ઉઠાવી. તાજેતરમાં એક અધિકારીએ જણાવ્યું કે આ મકાન વાસ્તવમાં શૌચાલય છે.’
તેમણે વધુમાં જણાવ્યું કે ‘મકાનનો ભગવો રંગ ભ્રમનું કારણ બન્યું હતું. હવે આ શૌચાલયને ગુલાબી રંગ ચોપડવામાં આવ્યો છે. અન્ય એક રિપોર્ટમાં જણાવ્યા પ્રમાણે આ શૌચાલયનું ઉદ્ઘાટન એક વર્ષ કરતાં વધારે સમય પહેલાં થયું હતું, પરંતુ આના દરવાજા પર તાળું લાગેલું હતું.