13 October, 2020 07:17 AM IST | Delhi | Gujarati Mid-day Correspondent
શ્યામ કી રસોઈ
શું આજની મોંઘવારીના જમાનામાં કોઈ એક રૂપિયામાં આખી થાળી ખવડાવે એવું સંભવ છે? આ અસંભવને નજરે જોવું હોય તો દિલ્હીની ભૂતોવાલી ગલીમાં નાન્ગોઈઝ શ્યામ રસોઈમાં સવારે ૧૧થી ૧ વાગ્યા દરમ્યાન જાતે જઈને જોવું જોઈએ. અહીં માત્ર ગરીબો જ નહીં, કોઈ પણ વ્યક્તિ આવીને થાળી જમી શકે છે અને એ પણ માત્ર એક રૂપિયામાં. સવારના સમયે અહીં લાંબી લાઇન લાગેલી જોવા મળે છે. ૫૧ વર્ષના પ્રવીણ કુમાર ગોયલ છેલ્લા બે મહિનાથી આ રસોડું ચલાવે છે.
તેમનું કહેવું છે કે આ રસોડા ઉપરાંત દિલ્હીના ત્રણ અલગ-અલગ વિસ્તારમાં ઇ-રિક્શા દ્વારા લોકોને પાર્સલ પણ મોકલવામાં આવે છે. શ્યામ કી રસોઈ થકી હજારો લોકોને ભોજન મળે છે અને એ માટે તેઓ માત્ર એક રૂપિયો લે છે. અલબત્ત, પ્રવીણ કુમાર ગોયલના આ સામાજિક કાર્ય માટે લોકો સામેથી આવીને ડોનેશન આપી જાય છે. કોઈ અનાજ આપી જાય છે તો કોઈ શાકભાજી. કેટલાક લોકો ડિજિટલ પેમેન્ટ દ્વારા પણ ડોનેશન આપી જાય છે. એ જ રીતે તેમનું આ કામ ચાલે છે. પ્રવીણકુમારનું કહેવું છે કે હાલમાં અમારી પાસે સાત દિવસ સુધી એક-દોઢ હજાર લોકોને ખવડાવી શકીએ એટલું રાશન છે. નવાઈની વાત એ છે કે આટલા મોટા કામ માટે તેમણે માત્ર છ-સાત લોકોને જ કામે રાખ્યા છે જેમને રોજના ૩૦૦-૪૦૦ રૂપિયાનું મહેનતાણું ચૂકવાય છે. બાકીનું મોટા ભાગનું કામ કેટલાક વૉલન્ટિયર્સ દ્વારા મૅનેજ થાય છે. શરૂઆતમાં આ થાળી દસ રૂપિયામાં આપવામાં આવતી હતી, પણ હવે તે માત્ર એક જ રૂપિયામાં અપાય છે. થાળીમાં રોટી, સોયાપુલાવ, પનીર, કઠોળ અને સ્વીટ હલવા જેવી આઇટમો હોય છે અને દર રોજ એમાં વરાયટી બદલાતી રહે છે.