04 January, 2020 10:40 AM IST | Haryana
નેપાળી લુક હોવાથી બે બહેનોને પાસપોર્ટ ન મળ્યો
હરિયાણાની બે બહેનોને પાસપોર્ટ દેવાની ના પાડી દેવાના એક મામલાએ જબરું તૂલ પકડ્યું છે અને એને કારણે હરિયાણા સરકારે પણ વચ્ચે પડવું પડે એવી નોબત આવી છે. વાત એમ હતી કે સંતોષ અને હિના નામની બે બહેનોએ પાસપોર્ટ માટે અરજી કરી હતી પરંતુ તેમના દસ્તાવેજ પર એવું લખવામાં આવ્યું કે તેઓ નેપાળી છોકરી જેવા લાગે છે. બન્ને બહેનોએ ચંડીગઢના પાસપોર્ટ કાર્યાલયમાં અરજી કરી હતી પણ તેમના લુકને કારણે તેમને પાસપોર્ટ આપવાની ના પાડી દેવામાં આવી એટલું જ નહીં, અરજી પર ‘અરજીકર્તા નેપાળી લાગે છે’ એવું કારણ પણ લખી આપવામાં આવેલું જે હવે હરિયાણા સરકાર માટે માથાનો દુખાવો બની ગયું છે.
આ પણ વાંચો : બોલો, યુગલે ઍમ્બ્યુલન્સમાં બેસીને લગ્નમાં એન્ટ્રી મારી
રાજ્યના ગૃહપ્રધાન અનિલ વીજ સુધી આ વાત પહોંચતા તરત જ લાગતાવળગતા અધિકારીઓને તાત્કાલિક પગલાં લેવાનો નિર્દેશ અપાયો છે અને ટૂંક સમયમાં જ તેમને પાસપોર્ટ આપી દેવામાં આવશે એવી ધરપત અપાઈ છે.