1000 વર્ષ જૂનું ઓકનું વૃક્ષ ઇંગ્લૅન્ડના ટ્રી ઑફ ધ યર તરીકે પસંદગી

1000 વર્ષ જૂનું ઓકનું વૃક્ષ ઇંગ્લૅન્ડના ટ્રી ઑફ ધ યર તરીકે પસંદગી

ઓકનું વૃક્ષ

ઈંગ્લૅન્ડના લિવરપૂલમાં ૧૧મી સદી વખતે જેનું અસ્તિત્ત્વ હતું એવા વૃક્ષને હાલમાં ૨૧મી સદીમાં ખાસ પુરસ્કારથી સન્માનિત કરવામાં આવ્યું છે. ઓકનું આ વૃક્ષ નૉર્મસે ઇંગ્લૅન્ડ પર વિજય મેળવ્યો એ વખતે એટલે કે ૧૦૬૬ની સાલમાં પણ મોજૂદ હતું. ૨૦૧૪ની સાલથી ઇંગ્લૅન્ડ અને આયરલૅન્ડમાં કોઈ ખાસ ઇતિહાસ ધરાવતા વૃક્ષોને ટ્રી ઑફ ધ યર માટે પસંદ કરવામાં આવેે છે. ૨૦૧૯માં એનું બહુમાન લિવરપૂલના ઓકના વૃક્ષને મળ્યું હતું. આ વૃક્ષો કેટલાં જૂનાં છે એ તો ઠીક પણ સાથે એની સુંદરતા પણ કેવી છે એ પણ મહત્ત્વનું છે અને એ માટે લોકો પાસેથી વોટિંગ પણ કરાવવામાં આવે છે.

આ પણ વાંચો : શરૂ થઈ છે ડરામણી અને ગંદીગોબરી ઢીંગલીઓની સ્પર્ધા

આ ઓકના વૃક્ષે કુલ ૧૧,૦૦૦ મતમાંથી ૩૪ ટકા મત મેળવ્યા હતા. એની સામે સ્પર્ધામાં એસેક્સમાં એક મહેલ પર ઉગેલું ગૂલરનું વૃક્ષ અને વાઇટ આઇલૅન્ડ પર આવેલું એક ડ્રૅગન ટ્રી હતું. 

ઓકનું આ વૃક્ષ હવે યુરોપિયન ટ્રી ઑફ ધ યરની સ્પર્ધામાં આવતા વર્ષે ભાગ લેશે. બીજા વિશ્વયુદ્ધ દરમ્યાન કોઈ સૈનિક યુદ્ધ માટે નીકળતો ત્યારે આ ઝાડનાં પાંદડાં ખિસ્સામાં રાખતો હતો. એવી માન્યતા હતી કે એમ કરવાથી સૈનિકની રક્ષા થાય છે. જેટલો જૂનો એનો ઇતિહાસ છે એટલી જ રસપ્રદ કહાણીઓ એની સાથે વણાયેલી છે. લોકવાયકા જ નહીં, ૧૮૦૬માં વિલિયમ્સે લખેલી એક બુકમાં પણ ઉલ્લેખ થયો છે કે આ વૃક્ષ હકીકતમાં એક ડરામણા ડ્રૅગનનું શરીર છે. કોઈ યોદ્ધાએ ડ્રૅગનને મારી નાખ્યો હતો એટલે એનું શરીર વૃક્ષમાં તબદિલ થઈ ગયું હતું. ૧૮૬૪માં એક જહાજમાં ભરેલો દારૂગોળો ફાટતાં આ વૃક્ષમાં તિરાડો પડી ગયેલી અને એમ છતાં એ બચી ગયું હતું.