22 May, 2026 09:39 AM IST | Kolkata | Gujarati Mid-day Correspondent
રાજ સિંહ, રાજકુમાર સિંહ
પશ્ચિમ બંગાળમાં BJPની જીત પછી સુવેન્દુ અધિકારીના પર્સનલ અસિસ્ટન્ટ ચંદ્રનાથ રથની હત્યા થઈ હતી. આ કેસમાં તપાસ જેમ-જેમ આગળ વધી રહી છે એમ કેસ વધુ ગૂંચવાતો જાય છે. હાઈ પ્રોફાઇલ મર્ડર-કેસમાં એક મોટી ગરબડ થઈ હોવાનું તપાસ એજન્સીઓએ જાહેર કર્યું હતું. એ ગરબડ એક નામને કારણે થઈ હતી.
૧૧ મેએ કલકત્તા પોલીસે અયોધ્યાની પોલીસની મદદથી રાજ સિંહ નામની એક વ્યક્તિને પકડી હતી. આ પહેલાં પોલીસ બક્સરમાંથી બે આરોપીઓ વિકી મૌર્ય અને મયંક મિશ્રાને પકડી ચૂકી હતી. તેમની પૂછપરછમાં જ રાજ સિંહનું નામ સામે આવ્યું હતું. તપાસ-એજન્સીઓને પણ ખબર પડી કે આ જ શૂટર છે જેણે શૂટઆઉટમાં મહત્ત્વની ભૂમિકા ભજવી છે. પોલીસે બહુ જ ઝડપથી રાજ સિંહની ધરપકડ કરી લીધી. જોકે પૂછપરછ દરમ્યાન સમજાયું કે આ જે માણસને પકડ્યો છે એ ખોટો છે. તેની સામેના કોઈ પુરાવા નહોતા મળી રહ્યા કે તે એ સમયે ત્યાં હાજર હતો.
બે દિવસ પહેલાં આ કેસમાં ચોથી વ્યક્તિને પકડવામાં આવી હતી. આ ધરપકડ રાજકુમાર સિંહની હતી. આ ધરપકડ પછી ગરબડ શું હતી એ સામે આવ્યું. અસલી શૂટર રાજ સિંહ નહીં, રાજકુમાર સિંહ છે. રાજકુમારને તેની ટોળકીમાં લોકો રાજ સિંહ તરીકે ઓળખતા હોવાથી તપાસ-એજન્સીઓ ભ્રમમાં પડી હતી અને ખોટી વ્યક્તિને ઉઠાવી લીધી હતી. રાજકુમાર સિંહે જ ચંદ્રનાથ રથ સામે ગોળીઓ ચલાવી હતી. જોકે એની પાછળનો હેતુ હજી સુધી સામે નથી આવ્યો. શું પૉલિટિકલ દુશ્મની હતી? કોઈ વેપારી વિવાદ હતો કે પછી કોઈ અલગ ઍન્ગલ?
