16 December, 2025 06:07 PM IST | Hyderabad | Gujarati Mid-day Online Correspondent
સાજિદ અકરમ, નવીદ અકરમ
ઑસ્ટ્રેલિયાના બીચ પર થયેલા ઇસ્લામિક આતંકવાદી હુમલાની ઘટનાના આરોપીનું ભારત સાથે કનેક્શન હોવાની ચર્ચાઓ શરૂ થઈ હતી, જોકે આ મામલે હવે ભારત દ્વારા પણ એક સત્તાવાર પુષ્ટિ જાહેર કરવામાં આવ્યું છે. તેલંગાણા પોલીસે મંગળવારે સત્તાવાર રીતે પુષ્ટિ આપી છે કે સિડનીમાં બૉન્ડી બીચ પર થયેલા જીવલેણ ગોળીબારના બે આરોપીઓમાંથી એક સાજિદ અકરમ મૂળ હૈદરાબાદનો રહેવાસી હતો અને 1998માં ઑસ્ટ્રેલિયા સ્થળાંતર કરીને ગયો હતો. આ સ્પષ્ટતા અગાઉના મીડિયા અહેવાલો વચ્ચે આવી છે જેમાં અકરમની રાષ્ટ્રીયતા ખોટી રીતે પાકિસ્તાની તરીકે ઓળખવામાં આવી હતી.
તેલંગાણા પોલીસ દ્વારા જાહેર કરાયેલી પ્રેસ નોટ અનુસાર, 14 ડિસેમ્બરના રોજ બૉન્ડી બીચ પર જાહેર હનુક્કાહ તહેવારની ઉજવણી દરમિયાન 50 વર્ષીય સાજિદ અકરમ અને તેના 24 વર્ષીય પુત્ર નવીદ અકરમે લોકો પર ગોળીબાર કર્યો હતો, ઘટનામાં 16 લોકો માર્યા ગયા હતા અને અનેક ઘાયલ થયા હતા. ઑસ્ટ્રેલિયન અધિકારીઓ આ ઘટનાને આતંકવાદી હુમલો ગણાવી રહ્યા છે, પ્રાથમિક તપાસ સૂચવે છે કે પિતા-પુત્રની જોડી ISIS વિચારધારાથી પ્રેરિત હતી. આ ઘટના દરમિયાન હુમલાખોરોમાંથી એકનું મોત નીપજ્યું હતું.
પોલીસે જણાવ્યું હતું કે સાજિદ અકરમે રોજગારની શોધમાં લગભગ 27 વર્ષ પહેલાં ઑસ્ટ્રેલિયા જતા પહેલા હૈદરાબાદમાં વાણિજ્યની સ્નાતકની ડિગ્રી મેળવી હતી. બાદમાં તેણે યુરોપિયન મૂળની મહિલા વેનેરા ગ્રોસો સાથે લગ્ન કર્યા હતા અને ઑસ્ટ્રેલિયામાં કાયમી સ્થાયી થયા હતા. જ્યારે સાજિદ પાસે ભારતીય પાસપોર્ટ છે, ત્યારે તેનો પુત્ર નવીદ અને પુત્રી ઑસ્ટ્રેલિયામાં જન્મેલા હતા અને ઑસ્ટ્રેલિયન નાગરિક છે. તેલંગાણા પોલીસે નોંધ્યું હતું કે સ્થળાંતર પછી અકરમનો હૈદરાબાદમાં તેના પરિવાર સાથે ખૂબ જ ઓછો સંપર્ક હતો અને મિલકતની બાબતો અને કૌટુંબિક મુલાકાતો સહિત વ્યક્તિગત કારણોસર તે ફક્ત છ વખત ભારત આવ્યો હતો. સંબંધીઓને કોઈ કટ્ટરપંથી વલણ કે પ્રવૃત્તિઓ વિશે કોઈ જાણકારી ન હોવાનું કહેવાય છે. પોલીસે ભારપૂર્વક જણાવ્યું હતું કે અકરમનો તેલંગાણામાં કોઈ ગુનાહિત કે પ્રતિકૂળ રેકોર્ડ નથી અને ભારપૂર્વક જણાવ્યું હતું કે તેના કટ્ટરપંથીત્વનો ભારત સાથે કોઈ સંબંધ નથી. ઑસ્ટ્રેલિયામાં તપાસ ચાલુ હોવાથી અધિકારીઓએ મીડિયા અને જનતાને અટકળો ટાળવા વિનંતી કરી હતી. જેથી આ બન્ને ઇસ્લામિક આતંકવાદીઓનો ભારત સાથે કોઈ સંબંધ ન હોવાની સ્પષ્ટતા કરવામાં આવી છે.